1. Home / History / মাদৈ-সরারেল

মাদৈ-সরারেল

বিষ্ণু্প্রিয়া মণিপুরী ঠারর লৌকিক এলার লুপা দিক আহান মাদৈ-সরারেলর এলা । মূলত বৈশাখ-জেঠ মাহাত ডিগল খরার সমেয়ত রাতি নুঙেই-নঙতলে ইমা-ইন্দোলে লপুকে ইন্দ্র-সরারেল গিরকরাঙ ‌ বরণ মাগতে গা মাদৈ-সরারেলর এলা দিলা। —এবাকাও কুন-কুন লয়াত বরণ-ডাহানির এলা পাল করতারা। দেবরাজ ইন্দ্র বরণর দৌগ, বৈদিক যুগর প্রধান দৌগ ইন্দ্র, ঋকবেদে হাবিত্ত য়াম শোলক/এলা আসেতা ইন্দ্রর নাঙে। বৈদিক যুগ লয়নির মাপাদেত্ত ইন্দ্র গিরকরাঙত বিষ্ণুর গুরত্ব বপনি অকরেসিল, — তাপক-তাপক টেইপাঙ মানুয়ে বিষ্ণুদেবরে ভগবান বুলিয়া নিঙকরানি অকরেসিতা। থাইনাকার দিনে(প্রাচীন কালে) মণিপুরীয়ে ইন্দ্র উপাসনা করেসিলা উতার উদাহরণ হান বরণ মাগানির অনুষ্ঠানে পালকরতারা মাদৈ-সরারেলর এলা।

‘সরারেল’ শব্দর ব্যুৎপত্তি বিশ্লেষণ :-
সুর=দৌ অর্থাৎ দেবতা, রেল=শ্রেষ্ঠ/পতি/রাজা। সুর+রেল= সুররেল–>সরারেল/সরালেল (প্রাকৃত ওয়াই গ) মানে দেবরাজ/দেবপতি/দেবশ্রেষ্ঠ অর্থাৎ ইন্দ্র।(‘রেল’ বিঃ মণিপুরী ওয়াইগ, এবাকাও ক্ষেত্র বিশেষ ব্যাবহার করিয়ার –যেমন ‘অজারেল’=ডাঙর/নাঙপালপা অজা, মেইপারেল=ডাঙর/নাঙপাল্পা/শ্রেষ্ঠ মেইপা) । ‘সরালরাজা’ ওয়াই এগও আমি দেবরাজ ইন্দ্রর প্রতিশব্দগ হিসাবে মাতিয়ার।
‘সরাল’ ওয়াই এগ আহেসেতা সঙ্স্কৃত সুরালয়ত্ত। সুরালয়'(সুর+আলয়) মানে দেবতাদের আলয় বা স্বর্গ। ‘সুরালয়’র বিঃ মণিপুরী short form হান ‘সরাল'( হিন্দিতও ‘আলয়'(গৃহ) ‘আল’ উচ্চারিত অনার নজির আসে, যেমন- ‘শ্বশুর+আলয়’=শ্বশুরালয়–>শ্বশুরাল,)। ‘মাদৈ’ ওয়াই এগ সঙ্স্কৃত ‘মহাদেবী’র অপভ্রংশগ(ডা: কে.পি. সিংহ)। ব্যুৎপত্তি বিশ্লেষণ এহানাত আমি লেপনি পারিয়ার যে সরারেল, সরাল বারো মাদৈ এরে ওয়াই তিনগও প্রাকৃত শব্দ, সঙ্স্কৃত ওয়াইর অপভ্রংশ ।
মাদৈ- সরারেলর মূল ওয়ারি হান এসাদে—-‘কিতাপারা দিন আহান সরারেল গিরক আট্টিঙ্গাদে বুলাত নিকুলেসে উবাকা লিকলির দৌগ পারা হবাসে অলকগ লকেইর নিঙলসৌ আগো তার আহিত পরিল। টেইপাঙমানু নিঙল এগর রাশি-কশি অসে হবা এহান দেহিয়া জারে নুয়েইল, লপুকগত খেতির কাম করিরি নিঙলশৌ এগ দাপদোয়েইলো। লুহঙ করিয়া পাটরাণীগর পদফামে বহেইল। তেই মাদৈ নাঙে পালোয়া স্বর্গৎ সরাল রাজার কন্নুঙে থাইলি। সরারেলর বরে তেইর বেয়াপা নুয়ারা-পানি ককয়া হবা-বালা অয়া নুঙেই অইলা।

সরারেলর বরে নঙসাঙ অইল মরণ-জরণ নেই মাদৈগিদেইর বেয়াপার গাঙর কুকুর আগো মরে পরিলগা। টেইপাঙ মানুগর ঠৌনা ডাক-সেলপুঙ বারেয়া কুকুর এগরে দাহ করাত শশ্মানে নিলাগা।

অজা ডাঃ কালী প্রসাদ সিংহ গিরক খম করেসে মাদৈ -সরারেলর এলা হান–“

মাদই গিদেই সালইলী, বক্চা বাধিয়া সালকইলা

কতিয়ো দূরেই আইলীতা

টেঙ্গারা সিঞ্চাঙ লালইলী, যাবারো মাটিয়ো না দেখলে

কতিয়ো দূরেই আইলীতা

পাম্পল টিংদিয়া কাদিরী, ইমা বুলিয়া ডাহিরী

কতিয়ো দূরেই আইলীতা৷

হুনরতা রাজা হুনরতা৷

বাবরো ঘরগো পুরেরকো,যেইঙগা হে রাজা যেইঙগা,

–নাযেইগা মাদই নাযেইগা ‘তোর বাবারো ঘরগো না পুরের,

যেইঙগা হে রাজা যেইঙগা হুনারো কেইরাক লামা দিয়া দে

বাবরো ঘরগো পুরেরকো–

‘–নাযেইগা মাদই নাযেইগা ‘তোর বাবরো ঘরে না যেইগা’—

তোর বাবারো ঘরে গেলেগা হুয়র পহু(মাউ/মাংস) খেইতেইগা

মদরো সরাপ খেইতেইগা’

হুনারো কেইরাক লামাদে, যেইঙগাহে রাজা যেঙগা হে

কারিফাবা থয়া যাগা হুনার কেইরাক লামা দিলু

‘–‘তোর বাবারো ঘরে গেলেগা দিঘালি পিরাত না বইছগা

মদরো সরাপ না পিছগা, হুয়র পহু নাহেইছগা

মাদই গিদেই কেইরাক লামরীয়ে

ডাকৌ কুরুঙ(করতাল?)বারেইতারা,বেলাউ(বেনা?)কেক্রক(পিপিনি জাতীয়বাদ্য যন্ত্র?বাজেইতারা

মাদই গিদেই কেইরাক লামরীয়ে

নিঙলো জেঠী আহিলি ডিগালী পিরা নিকালেই

‘নাবইতৌ বাবা নাবইতৌ বাবা নাবইতৌ—

রাজারো মানা পেইলুকো নাবইতৌ বাবা নাবইতৌ’

নিঙলো জেঠী আহিলি, মদরো সরাপ নিকালেই, হুয়র পহু রাধে দেই৷

হুয়র পহু নাহেইতৌ, মদরো সরাপ না পিতৌ ডিগালী পিরউ না বইতৌ

না দেখতই ইমা না দেখতই,তাম্বুল হাতগ টাংতৌরে

মহরি হাতহান খালকরো,হমাগা মাদই পিগা

লমইলু বাবা লমইলু—

রাজরো কেইরাক তুললকো লমইলু বাবা লমইলু—

না কাদি কারিফাবা লেইপাকথীপা কারিফাবা

মাদই গিদেই থামনা লালাইরিয়ে

 ফুলতলার স্ব্রর্গীয় মধুমতী ক্ষত্রানী গিথানকে এলা এহানর আরাক পাড়েং দুহান মাতেসিলি,— অও পাড়েং দ্বিয় হানও দিলুঃ–

“দম্বা গিদেয়ো দামিনী গিদেয়ো, লেইসুপুঙে শাতৈরী গিদেয়ো

ইমারো মেঙসেল দেহুরি—বাবারো মেঙসেল দেহুরি

—আহালে নিঙলআহিলী-ডিগালি পিরা নিকালেই–“

স্বর্গত্ত পুরি কুকুরগ দাহর জ্বিগ দেহিয়া মাদৈগিদেয়ে নিঙ করলতাই তেইর বেয়াপার গাঙে ঘরজ্বি লাগেসে। বেয়াপার ঘর-জিনা খুটৌ-নাটৌ অইল সাদ বুলিয়া আহালে (বেয়াপার ঘরে) যানা মনেয়া সরাল রাজারাঙ গেঙটানি অকরলো।
“মাদই  গিদেই সালইলী, বক্চা বাধিয়া সালকইলা
         কতিয়ো দূরেই অইলীতা৷
টেঙরা-সিঞ্চাঙ ললইলী, যাবারো মাটিয়ো না দেখলে
কতিয়ো দূরেই অইলীতা৷
 পাম্পল  টিংদিয়া কাদিরী, ইমা বুলিয়া ডাহিরী
কতিয়ো দূরেই অইলীতা৷
‘হুনরতা রাজা হুনরতা৷
বাবারো ঘরগো পুরেরকো, যেইঙগা রাজা যেইঙগা৷’
— ‘না যেইগা মাদই  নাযেইগা, তর বাবারো ঘরগো না পুরের’,
যেইঙগা রাজা যেইঙগা, হুনার কেইরাক লামা দিয়া দে।——-।”
গেঙটানি আকয়া সরাল রাজায় তেইরে শর্ত সাপেক্ষে পুতক কারিফাবারে রাজ কন্নুঙ গত থয়া বেয়াপার গরে যানার য়াথাঙ্ দিলো। বেয়াপার গরে গিয়া মদ , হুয়রর মাহু (মাঙস) নাহানিরকা মাতলো, বারো হাবির লগে পারেঙে বয়া নাহানিরকাও মাতলো।—এসাদে শর্ত দিয়া স্বর্গর কন্নুঙগত্ত বেয়াপার গরে যানারকা হুনার কেইরাক হান পারে দিলো। ডাক-মৈপঙ বারেয়া মাদৈ গিদেই বেয়াপার গরে সালইলি।
তেইরে খোয়ানিরকা বাপকে হুয়রর মাহু কিতা রাদানির য়াথাঙ দিলো। সরাল রাজায় মানা(আপত্তি) করেসে হানতে খানা না করলো। তেব বাপক-মালকে গরর মানুর লগে পারেঙে (ডিগালি পিরাত) বয়া খানার কাজে বারে বারে মাতানি অকরলা। তেই খেইতে সরাল রাজায় স্বর্গত্ত না দেখবতা বুলিয়া তাম্বুল হাতগো(সাতগো) খাল করলা, উতার তলে তলে বারো মহরি হাত হান টাঙলা।মহরির ভিতরে বহোয়েয়া খোয়ানির সিজিল করলা।
কিন্তু তেই খানার কাজে মহরি তুলিয়া ভিতরে হমানিরকা করতেই সরাল রাজায় স্বর্গত থায়া হারপেইল,— হুনার কেইরাক হান তুলিয়া কন্নুঙগর থঙচিল (দুয়ার) হান গাটলো।
মাদৈগিদেই স্বর্গত যানা নুয়েইল।’
মাদৈ-সরারেল ওয়ারি হানর তুল মান্না মেইতেই লোক কাহিনী আহানও আসে। ওয়ারি উহান অমাটিক তঙাল নাসে।
“——–স্বর্গাধিপতি সরারেন (সরারেল র মেইতেই উচ্চারণ হান)গিরক বরণর দৌগ,তার মূল অস্ত্র হান বজ্র হান, দলা আত্তিগ তার বাহনগ।
হুইমু লেইমা নাঙে কোন্থৌজাম লকেইর( Konthou clan)র বেয়াপা আগো আসিলি, তেইরতা রাশি-কশি হবা নিঙলসৌ আগো আসিলি‌ । কিতা পারা দিন আহান নিঙল শৌ এগ মিয়ারর  খেতির কাম করিরি উবাকা সরারেল গিরকে দেহিয়া ঠিকপা বেলল। আট্টিঙ্গাত থায়া সরারেল গিরকে নিঙলশৌ এগরে মাতল—‘হে কোন্থৌজামর নিঙলশৌগ আজিত্ত পুরি পাঁচদিন পালপাৎ মি দলা আত্তিগত চড়িয়া তুমারাঙ আহিতৌ বারো উদিন তরে লুহঙ করিয়া নিতৌগা।” দৈববাণী এহান হুনিয়া হুইমু লেইমার ঝিলক উঙয়া ঘরে আইলি।উদিনত ব্রহ্মচর্য পালন করানি অকরলো। পাঁচ দিন পালপাৎ সরারেল দলা আত্তিগলো আয়া তেইরে লুহঙ করিয়া স্বর্গর পাটরাণী গ করলগা। বারো অমর অনার বর দিলো। হারৌ অয়া সরারেল গিরকে তেইর বেয়াপারেও বর দিয়া অমর করে দিলো। কিতাপারা দিন আহান হরপে কামাড়েয়া তেইর বেয়াপার শিকারী কুকুর আগো মরিল।ডাক-সেলপুঙ বারেয়া কুকুর এগর শারাদ্ধ করলা। স্বর্গত থায়া বেয়াপার ঘরে শারাদ্ধ করতারা এহান হুনিয়া সরারেল গিরকরে মাতিরি –‘তিতে মর বেয়াপারে অমর অনার বর দিলেগ না, — কুঙ্গ দৌ অয়া মর বেয়াপার ঘরে শারাদ্ধ করতারাতা? কুকুর আগো মরিয়া শারাদ্ধ-কর্ম করতারা উহান সরারেল গিরকে বাগেইল। অয়াও তেই শারাদ্ধত য়ৌঅনি মনেইল। সরারেল গিরকে আহালে (বেয়াপার ঘরে) যানার য়াথাঙ দিলো, কিন্তু টেইপাঙ মানুর ঘরে নাহানির কা মাতলো।
নঙসাঙ দিন বাদে ঘরে আইলি নিঙলগরে মালকে ভাত আকচারা খোয়ানির সিজিল করল। সরারেলে ভাত খেইতে না দেকবতা বুলিয়া গজেদে ফুতি টাঙিয়া খানারতা হাজা দিলো। ভাত চাঙলোকে খানাত বহিতেই সরারেলে হার পেইলো। স্বর্গত থায়া গজেত্ত পুরি ভাত চাঙলোকে থু বুলিয়া সেপ চানি বেলা দিলো। তেই ভাতচাঙলোকে বহিলি এহান হারপেয়া সরারেল গিরক নুঙেই নাপেইল—এহান হারপেয়া নাহেইলো। স্বর্গত সালইলি, সরারেলে তেইরে না লক্করলো (গ্রহন না করলো) । তেইর বেয়াপারে বারো তেইরে যেতা যেতা বর দিয়াসিল উতা আল্থক করলো।
বৌ(পবনদেব)এহানেতে তেই ভাত চাঙলোকেত্ত নাহেয়া উঠলি উহান দেহেসেগ। বিষয় এহান সরারেল গিরকরে বাগেইলো। তাও সেঙকরে নিঙলশৌ এগরে য়া করলো। তেইরে বারো তেইর বেয়াপারে সেঙকরে অমর অনার বর দিলো।”
মেইতেই লোক গল্প এগ বারো বিঃ মণিপুরী মাদৈ-সরারেলর ওয়ারি হান চপক মান্না ।মাদৈ-সরারেলে ঐরাবত আত্তিগর ওয়ারি-পরি নেই বারো মাদৈর মালকর নাঙ হানও নেই। মেইতেই লোক কাহিনী এহান লয়ইতেগা সরারেলে মাদৈ গিদেইরে য়া করিয়া গ্রহন করেসে, কিন্তু বিঃ মণিপুরী মাদৈ-সরারেলর ওয়ারিত কথা চুটি এহান না পাসু।
ঋকবেদর প্রধান দৌগ ইন্দ্র, বিভিন্ন পৌরাণিক ওয়ারিতও তারে স্বর্গাধিপতি দেব রাজ অর্থাৎ সুরপতি বুলিয় মাতেসি। বিভিন্ন পৌরাণিক কাহিনীত দেবরাজ ইন্দ্রর বাহনগর নাঙ ঐরাবত বুলিয়া মাতেসি।তার বাহনগ ধলা আত্তিগ। তবে ঋকবেদর ইন্দ্ররতা ঐরাবতগ নেই। ঋকবেদে বারো বিভিন্ন পুরাণে ইন্দ্রদেবর খুচ্চু(আতিয়ার)হান বজ্র হান বুলেসি।ঋকবেদ বারো পৌরাণিক কাহিনীর দেবরাজ ইন্দ্রই কুন মরণশীল টেইপাঙ মানু নিঙল লুহঙ নাকরেসে। কিন্তু বিঃমণিপুরী বারো মেইতেই লোক কাহিনীর সরারেলে মণিপুরর টেইপাঙ মানু নিঙলগ লুহঙ করেসে। এসাদে তথ্যে নিঙে অর হিন্দু মাইথোলোজির ইন্দ্র বারো সরারেল আকগো অইলেও মাদৈ-সরারেলর ওয়ারি এহান মণিপুররে সৃষ্টি অসে মণিপুরী পৌরাণিক ওয়ারি হান ।
গ্রীক পৌরাণিক কাহিনীর জীউস ( Zeus)পাঙকালপা দৌআগো- । জীউসর ওয়ারির তুল মণিপুরর সরারেলর ওয়ারি খানি মান্না, —যেমন জীউস মেঘর দৌগ, তার মুল অস্ত্র হান বজ্র হান। তাও সরারেলর ঠৌনা টেইপাঙ মানুর নিঙল আগো লুহঙ করিয়া উগরে অমরত্বর বর দিয়াসিল। এরে কাফামে মণিপুরর সরারেল বারো গ্রীক জীউসর ওয়ারি খানি মান্না অসে।
ভারতীয় ইন্দ্রদেব বৈদিক যুগর দৌগ, গ্রীক জীউস( Zeus)র ওয়ারি উহানও প্রায় সম সাময়িক হান। আগেও মাতেসু বৈদিক যুগর পয়লাদে ইন্দ্রদেবই সর্ব শ্রেষ্ঠ দৌগ পালসিল।পরেদে ভগবান বিষ্ণু প্রধান দৌগ লেপসে বুলিয়া য়ামপারাগই মাতিয়া গিয়াসিগা।
বৈদিক ইন্দ্র বারো গ্রীক জীউসর লগে মণিপুরর সরারেলর ওয়ারি পরির মান্নাপা এহানে নিঙে অর বৈদিক যুগ লয়নির মাপাদে বা বৈদিক যুগেই মণিপুরে আর্য সঙস্কৃতি সম্পন্ন টেইপাঙ মানু লাম ল থাইবাগা। উহানে মণিপুর এহান প্রাচীন আর্যর লাম হান বুলিয়া য়ামপারাগই মাত্তারাতা।
তথ্যর  লিমঃ
1)’Bisnupriya Manipuri Bhashatattvar Ruparekha’ –By Dr. K.P.Sinha.
2) ‘The Bisnupriya Manipuri’s their language  literature and their culture’–By Dr. K.P.Sinha.
3)’উৎসবের উৎস’ –By সমর চক্রবর্তী৷
4)’A History Of Manipuri Literature’–By R.K.Jhaljit Singha.
5)’The History of Manipur(An early piriod)’–By Wahengbam Ibohal Singh.
 6)এতা বাদে মোর মালক সাকপী বিদ্যানগরর  শ্রীমতী সেনানু দেবী,  শ্রীমতী শেফলী সিংহ ৷
Copyright:- Pratap Sinha.

Leave a Reply

Search

Recent Videos

Recent Posts

IBBMA Icon Award 2023

ঈদর ছুটিৎ সিনেমা চানাৎ আহিক নটমণ্ডপে

আইবিবিএমএ আইকন অ্যাওয়ার্ড/IBBMA Icon Award

আপাঙর য়ারি – ৪

বীরমনি

Recent Publications

The Ithaak (14 November 2016)

The Ithaak (17 March 2011)

The Ithaak (21 November 2010)

Categories

    Bishnupriya Manipuri Calendar