মণিপুরী সাত বারর নাঙ—মণিপুরর রাজ-ক্ষমতা হস্তান্তরর অরুপিৱারি
পৃথিবীর অধিকাংশ ঠারে সপ্তাহর সাতবারর নাঙ গ্রহ-সংক্রান্ত বারো সংখ্যাসূচক ৷বিভিন্ন ভারতীয় প্রাকৃত ঠার, সংস্কৃত , বারো পালি ঠারর সপ্তাহর বারর নাঙ গ্রহ-সংক্রান্ত ৷ চীনা বারো জাপানি ক্যালেন্ডারর সপ্তাহর বারর নাঙ উতাও ভারতীয় সপ্তাহর নাঙর ভাবানুবাদ ৷ দক্ষিন-পূর্ব এশিয়ার বিভিন্ন Tibeto-Burman ঠারর সপ্তাহর নাঙ উতা ভারতীয় পালি বারো সংস্কৃত সপ্তাহর বারর নাঙর অপভ্রংশ(বিশেষ করিয়া বার্মিজ, মঙ্গোলীয়,থাই,ইন্দোনেশীয়ইত্যাদি) ৷সপ্তম-অষ্টম খ্রিস্টাব্দর মাপাদে ভারতীয় হিন্দু বারো বৌদ্ধ ক্যালেন্ডার চীন,জাপান বারো দক্ষিন-পূর্ব এসিয়াদে গিয়াসেগাগ ৷ উহানে উগদর বর্ষ-পঞ্জী বারো সপ্তাহর নাঙে ভারতীয় সংস্কৃত বারো পালি ঠারর প্রভাব পড়েছে ৷
মেইতেই সপ্তাহর দিন/বারর নাঙ — যেতারে মণিপুরী বারর নাঙ মাত্তারা উতা খানি তঙাল বারো অর্থবহ ৷মেইতেই বারর নাঙ এতা হাবি phrase আকেইগ, নাঙ এতার ব্যুত্পত্তি বিশ্লেষণ করলে ঙক্ষী করে হার পেয়ার ৷
১)নংমাইচিং = রবিবার (বিষ্ণুপ্রিয়া মণিপুরী উচ্চারণ হান ‘লাংমৈশিং /লাম্বইশিং )৷ “নং”=day, “মাই”=face, চিং=hill ! আক্ষরিক অর্থে –“টেঙারাগদে মেইথং হান দিলা দিনহান” , মানে “টেঙারাগদে মুঙদিলা(সালৈলা )দিন’হান ৷
2)নিঙথৌকাপা= সোমবার(বিষ্ণুপ্রিয়া মণিপুরী উচ্চারণ হান ‘নিঙথৌকাপা’ ) “নিঙথৌ= king/গোষ্ঠীপতি/রাজা (‘নিংথৌ’- ওয়াই এগপন্ডিত রাজ আতম্বাপু শর্মা গিরকে ‘নৃঠাকুর’র অপভ্রংশগ বুলিয়া মতেসে, তবে য়ামপারাগই কুকি বুলিয়া মাততারা,), “কা(পা)”=to ascended=গজেদে কানা।আক্ষরিক অর্থে — “রাজা টেঙারাগত কাইল দিন উহান” (Dr.K.P.Sinha গিরকে “সরারেল বা সরাল রাজা রাজা টেঙারাগত কা’সে দিন হান বুলিয়া মাতেসে)।
৩) লেইপাকপোকপা =মঙ্গলবার (বিষ্ণুপ্রিয়া মণিপুরী উচ্চারণ হান ‘লেইপাকপা’) লেইপাক =the earth /the land ,”পোক”=birth ,”পা”=পুংবাচক প্রত্যয়গ ৷ আক্ষরিক অর্থে -“রাজা গিরিয়ে লামহান জরম দিল দিনহান। “
৪)য়ুমসাকেইসা=বুধবার (বিষ্ণুপ্রিয়া মণিপুরী উচ্চারণ হান “ইমসাকেইসা”/”ইমসাইমসা” ৷( “য়ুম= house, গৃহ, সাকেই= dais/ (বাংলা) মাচাঙ/মাচা (বি:ম:)খাটি, সা = to erect/উবা /উলম্ব৷ আক্ষরিক অর্থে -(রাজাগিরিয়ে) খাটির গজে ঘর(টং-ঘর) উবা করল দিনহান (মানে বসত স্থাপন করল )”৷
৫) “সাগলসেল”=বৃহস্পতিবার (বিষ্ণুপ্রিয়া মণিপুরী উচ্চারণ হান-“সাকলসের”) সাগল=horse / গড়া; “সেল”=সালনি /যাত্রা করানি Iআক্ষরিক অর্থে -(রাজাগিরি)গড়াত চড়িয়া (যুদ্ধে )সালৈল দিনহান ৷
৬)”ইরাই”= শুক্রবার (আমিও ইরেই মতিয়ার)”ই “=blood / রকত ৷”লাই”(–>রাই)=flood / পাহানি ৷আক্ষরিক অর্থে -“(রাজাগিরিয়ে)রকত পাহেইল দিনহান I” (মানে রাজাই য়েঙনাপার রকত পাহেইল )I
৭)”থাংচা”= শনি বার (ঠাঙচা)I”থাঙ”=অসি / তলোয়ার I”চম্বা”(–>চা)=হিনাদেনা / পুছানি I আক্ষরিক অর্থে -“(রাজাগিরিয়ে)তলোয়ার ধয়া পুছিয়া থইলদিনহান” I
মেইতেই সপ্তাহর সাত বারর নাঙ এতা লিটিঙ করিয়া পাজালেইলে হুরকাং কিন্তু লু বারো অর্থবহ ওয়ারি আহান পেয়ার I,পাজালানির আগে আমারতা বিষয় আহান ঙক্খী করে হারপানি থক যে, আগেদে কুন দাপা আহানে ডাঙর কাম আহান করলে নাঙ্ হান পেইলতা দাপা উহানর মিকক গই বা রাজাগই(যেমন ‘সম্রাট অশোকর বাহিনী হানে কলিঙ্গ যুদ্ধে জিংলা’–কিন্তু আমি মতিয়ারতা ‘সম্রাট অশোক কলিঙ্গ যুদ্ধে জিংল’)।এরে ধারনা ইলয়া মেইতেই/মণিপুরী সপ্তাহর নাঙেত্ত নিকুলিল ভাবার্থ তলে পাজালেইলু:=
১)’আদিম মানু-দাপা আহান রাজাগই চিন-করিয়া টেঙারা আগদে সালৈলা।পৌ এহানল ‘নোংমাইচিং’ phraseগ হঙ্ইল,অর্থ হান -‘রবিবার’ ২)রাজা গিরি টেঙারা উগত কাইল।অর্থাত্ রাজা গিরিয়ে চিন করিয়া টেঙারাগত কাইলা।ওয়ারি এহানল ‘নিংথৌকাপা’ phrase এগ সৃষ্টি অইল; অর্থ হান ‘সোমবার’ ৩) ‘রাজা-গিরিয়ে নুয়া লাম আহান জরম দিল’ — মানে রাজার নেতৃত্বে লাম আহান দখল করলা, অথবা, জঙ্গল/বন সেঙ করিয়া বাস-যোগ্য করলা।পাড়েঙ্গ এহানল হঙইল phraseগ ‘লেইপাকপোকপা’ ,অর্থ হান মঙ্গলবার। ৪) ‘লাম উহানাত রাজাগিরিয়ে ঘর তুলেইল’;। মানে রাজাগিরির নেতৃত্বে বসতি স্থাপন করলা।– এরে পাড়েঙ্গ এহানল সৃষ্টি ওয়াইগ বা phraseগ ‘য়ুমসাকেইসা’ মানে ‘বুধবার’। ৫)’রাজাগিরি গড়াত্ চড়িয়া সালৈল’।আগেদে রাজা-রাজেশ্বর আত্তি বা গড়াত্ লালফামে/যুদ্ধে সালইলা। হানতে আমি নিংকরে পারিয়ার যে, রাজা গিরি গড়াগত্ চড়িয়া চিন করল-যুদ্ধে সালইলা। পৌ এহানল হঙইল ওয়াইগ ‘সাগলসেল’ মানে ‘বৃহস্পতিবার’৬) য়েঙনাপার(শত্রুর) রকত পাহেইলা ,মানে য়েঙনাপা মারলা।এহানল সৃষ্টি অইলতা ‘ইরাই’ অর্থাত্ ‘শুক্রবার’। ৭)থাঙ্জাঙ/তলোয়ার বা অস্ত্র ধয়া-পুছিয়া থইলা মানে যুদ্ধে জিঙিয়া অস্ত্র-সংবরণ করলা I”–পাড়েঙ্গ এহানল সৃষ্টি অইল ওয়াইগ ‘থাংচা’ মানে শনিবার।
নিঙে অর এহান আদিম টেইপাঙ মানু দাপা মনিপুর আগমন, বিজয়, রাজ্য অধিকার বারো শাসক দাপা হিসাবে প্রতিষ্ঠিত অনার অরুপি তথ্যহান I মেইতেইর দাপা আহানে — মাত্তারাতা সরাল রাজাই (সরারেল গিরকে) চিন করিয়া এসাদে ঘটনা প্রবাহ সংগঠিত অসে বারো মণিপুরে তানু প্রতিষ্ঠিত অসি । উসাদে অয়া মেইতেই সাত বারর নাঙ সৃষ্টি অসে ! এহান হাইহান দাপা আহান মানু মুঙেদেত্ত টেঙারাগ লালয়া আহিয়া মণিপুর উপত্যকার প্রাচীন অধিবাসী দাপা আহানরে জিঙিয়া লাম এহানাত প্রতিষ্ঠিত অসি ওয়ারি উহানল সপ্তাহর সাত বারর নাঙ থনা অসে। পৃথিবীর আর কোন ঠারে এসাদে বারর নাঙ নেই। এহানে প্রমাণিত অর নবাগত দাপা উহান মণিপুরে পালনির আগে আরাক মানু আক জাত পালয়া আসিলা, বারো উতারে জিঙিয়া তানু মণিপুরে প্রতিষ্ঠিত অসি –রাষ্ট্র-ক্ষমতা দখল করেসি ! উরে ওয়ারি উহানল বারর নাঙ লেঙসে I
মণিপুরর মুঙেদে ‘বারুনি পর্ব্বতগত ‘নংমাইচিং’ নাঙে পর্ব্বত-শৃঙ্গগ আছে — উহানে আমি লেপনি পারিয়ার নবাগত দাপা উহান মুঙেদেত্ত টেঙারাগ লালয়া মনিপুরে হমাসিহা। অনেক লেখকর দাবীহান — যে সাতহান ঘটনা প্রবাহর গজে ভিত্তি করিয়া মেইতেই/মণিপুরী ঠারর সাত বারর নাঙ সৃষ্টি অসে — উতা ‘সরারেল ‘ গিরকে (সরাল রাজায়) সংঘটিত করেসেতা I কিন্তু মেইতেই tibeto-burman ঠার হান, বারো মর মতে “সরারেল” — সংস্কৃত / পালিত্ত আহেছে প্রাকৃত ওয়াইগ I রাজপন্ডিত আতম্বাপু শর্মা গিরকর মতে ‘সুরেন্দ্র” শব্দর অপভ্রংশ “সরারেন”/”সরারেল” মানে ‘ইন্দ্র’ I নিঙে অর এইগা গিরকর মত এহানও চুম নাসে I সুর + রেল = সুররেল -> সরারেল ->সরালেল I সুর = দেবতা , রেল =শ্রেষ্ঠ !! শ্রেষ্ঠ দেবতা বা দেবপতি মানে ‘ইন্দ্র’ I (বিষ্ণুপ্রিয়া মণিপুরী বারো মেইতেই ঠারে শ্রেষ্ঠ / নাঙ পালপা অজা উগরে ‘অজারেল’/’অজারেন’ বারো শ্রেষ্ঠ মেইপাগরে ‘মেইপারেল’/’মাইবারেন’ মাততারা। হানতে ‘রেল’/’রেন’= শ্রেষ্ঠ /পতি/রাজা/king)I
২)য়ামপারা লেঙপা(লেখক) গিরক লকেইর মতে মণিপুরর পইলাকার রাজাগ “পাখাংবা” (পাহাংপা)।গিরক দিনে হরপগ অয়া থাইল, রাতি মানুর রূপ ধরল (*অনেকর মতে ক্ষুমলর ডরে দিনে হরপর বেশে লুকেয়া থাইল।)। সরারেল (সরালরাজা) বৈদিক দৌগ – ঋক বেদে মাতেসি “ইন্দ্র”– বরণর অধিকারীগ তার আতিয়ারহান “বজ্রহান” I বারো বৌদ্ধধর্ম শাখা আহান বৈদিক দৌলিশিং-দৌলাহা কতগরে নিঙকরলা –যেমন ব্রহ্মা,বিষ্ণু,মহেশ্বর,ইন্দ্র !
৩)মণিপুরর থাইনাকার প্রাকৃতভাষী(Aryan speaker) উতারে মায়াঙ বা কালাছা মাতেসি ! এবাকা উতাই বিষ্ণুপ্রিয়া -মণিপুরী নাঙ পাসি ! উতাই প্রাক-গৌড়ীয় বৈষ্ণব যুগে (রাধা-কৃষ্ণ কেন্দ্রিক ভক্তিবাদে ইলনির আগে ) ইন্দ্র-সরারেল র উপাসনা করেসি I ‘বরণ ডাহানি’ অনুষ্ঠান উহান ইন্দ্র-সরারেল-র উপাসনার নিদর্শন হান – এবাকাও মূর্তি-পালকরতারা I রাধা-কৃষ্ণ কেন্দ্রিক ভক্তিবাদ গৌড়ীয় বৈষ্ণব ধর্মে ইলনির পরেদেও সরালেল উপাসনা অনেকে করতারা।বারো মেইতেইরমাও বাককা দাপা কতহান আসি এবাকাও সরারেল গিরকর উপাসনা করতারা,।সরারেল গিরক কেন্দ্রীক মেইতেই লোক গল্প, লোকগীতিও য়াম অয়া আসে ।উহানে সরারেল/সরারেন গিরক বিষ্ণুপ্রিয়া মণিপুরী বারো মেইতেইর দৌগ —দ্বিয় ভাষিক গোষ্ঠীরতাও সমান অধিকার আসে অসে I
নিঙে অর, মণিপুরর প্রাচীন অধিবাসী দাপা আহানরে জিঙিয়া রাজা পালনির পরে স্বাভাবিক নিয়মে tibeto-burman ভাষী মেইতেইর লগে প্রাচীন অধিবাসী অংশ আহানর আত্মীকরণ অ-থাইব I উতারে ইলয়া “সরারেল-ভাবনা” মেইতেইর ভিতরেও সিতারাসেতা I মেইতেই সাত-বারর নাঙ এতার ব্যুত্পত্তি বিশ্লেষণ করলে নিকুলের অরুপি ওয়ারী এহানে প্রমাণিত অর – মেইতেই মনিপুর উপত্যকাত হমানির আগে লাম উহানাত তঙাল মানব -গোষ্ঠী আহান পালয়া আসিলা ! বাঙালি মুসলমান সপ্তদশ খ্রিস্টাব্দর পরেদে মনিপুরে লাম লয়া ,মেইতেই নিঙল লুহং করেসি ! উতার দারা-নালা ‘মেইতেই পাঙাল (খাই পাঙাল) Iঔ হাকতাকে বাঙালি হিন্দু অংশ আহানও মণিপুরে আশ্রয় নেসিগা – উতার পদবি ‘বসু’ ‘রায়’ –উতরে লেইরিকয়াম্বাম মাততারা I পরবর্তী সময় গৌড়ীয় বৈষ্ণব ধর্ম প্রচারর উবাকা(অস্টাদশ শতাব্দীত ) আরাক হিন্দু বাঙালি আক দাপা লাম উহানাত হমেইলাগা — উতরে “কির্তানা ” মাত্তারা উতার পদবি “দত্ত” “কর্মকার” I- হিন্দু বাঙালি দ্বিয় দাপাও(লেইরিক য়াম্বাম বারো কির্তানা ) জবর য়াতসিলা হানতে মেইতেইর লগে বৈবাহিক সম্পর্ক করিয়া ‘মেইতেই’ ঠার হান মাতৃভাষা হিসাবে গ্রহন করলা I ! এসাদে দাপা এতা মণিপুরহান মেইতেয়ী করন অয়া লমনির পরেদে লাম উহানাত হমাসিগত, হানতে এতারমা রাজা না-পালসি বারো এতার লগে মেইতেই যুদ্ধ-বিগ্রহ লাগানির কারণ নেই ! এতা বাদে আরাক কতহান clan(দাপা) মণিপুর উপত্যকাত অসি — ১)য়াইথিবী ২) লোয়েই, বারো ৩) চাকপা !
১)-“য়াইথিবী”=গৌড়ীয় বৈষ্ণব ধর্ম লনার পরেদেও অসামাজিক কাম-ধুম করিয়া out-cast অসি (জাত পরেসি)মেইতেই (য়াইথিবী মানে ‘অন্তর সাক্তি’ –“য়া”=হৃদয় ,”থি “=সাক্তি ,”বী”ওয়াহিগর লমৈতেগা য়ৌ অর প্রত্যয়গ ! সংস্কৃত ‘হৃদয়’ প্রাকৃত হিআ’ মৈথিলী বারো বাংলা ‘হিয়া’ বিষ্ণুপ্রিয়া বারো মেইতেই “য়া” ) I ২)”লোয়েই”= আতল্পা (নিম্নবর্ণ) মেইতেই লকেই আহান -এতা আদিম সর্ব-প্রাণ বাদী ধারনায় বিশ্বাসী,দৌ-দুক মাই-মন্ত্র য়াম বিশ্বাস করতারা ! দাপা এহান গৌড়ীয় বৈষ্ণব ধর্ম গ্রহন না-করেসি মেইতেই ! ৩)”চাকপা” = আমি চাকপই বুলিয়ার ,চাকচা (খাওয়া-খাদ্য) বাছা-বাছি না-করতারা মেইতেইর অংশ আহান —য়াম অনাচার মেইতেই দাপা বুলিয়া এতারে মেইতেই রাজাই গৌড়ীয় বৈষ্ণব ধর্ম গ্রহন করানি না-দেসে I রাজন্য আমলে এতাও out-cast অয়া আসিলা !এতা হাবি বিভিন্ন সামাজিক বারো ধর্মীয় কারণে মেইতেইত্ত খেয়সি দাপা – মনিপুরে রাষ্ট্র-ক্ষমতা পানার পরেদে তানু খেই-খেই অসিতা ! গৌড় ধর্মীয় কর্ম-কাসা বাদে আর-আর রুহি-বৃত্ত মেইতেইর লগে এরে দাপা তিন হানরতা চপক মান্না – ভাষা,খাদ্যাভ্যাস,লৌকিক কর্ম-কাসা হাবি মান্না ! হানতে এতাই মেইতেইএ লগে অতীতে আকদাপা(single clan)আসিলা—আকসাটেই মণিপুরে হমাসি, উহানে এতার লগেও যুদ্ধ-বিগ্রহ লাগানির প্রশ্নই নেই !
এসাদে তথ্যে নিঙে অর মেইতেই হমানির লাহুল আগেত্ত মণিপুর উপত্যকাত টেইপাঙ মানু আকদাপা আসিলা – সংস্কৃতিগত-ভাষাগত তঙাল দাপাহান ! যেহেতু মনিপুরর প্রাকৃত ভাষী(Indu Aryan speaker) মায়াঙ / কালাছা উতাই তানুরাঙত পুল্লাপ তঙাল দাপাহান, উহানে আমি লেপনি পারিয়ার উতাই মণিপুর উপত্যকার থাইনাকার অধিবাসী ! এরে সু-সংস্কৃতি সম্পন্ন দাপা আহানই পালয়া আসিলাতা ! উতাই পঞ্চদশ খ্রিস্টাব্দে বিষ্ণুপুরর বিষ্ণুমন্দির লিঙখাত করেসিগ ! পরবর্তী হাকতাকে মণিপুর ভেলী মেইতেয়ী-করণ অনার পরেদে 1760AD ত মেইতেইপতি (মেখলীরাজ) চিং-থুং-খুম্বার য়াথাঙে (নির্দেশে) অজা মনিরাম সিংহ পাঁচগ(৫) পাঞ্জীর পাঙলাকে “মেইতেই বর্ষ-পঞ্জী” (মেইতেই Calendar) লেঙকরলা ! নিঙে অর উবাকাই মেইতেইর মনিপুর আগমন -বিজয় বারো রাজক্ষমতা দখলর অরুপি য়ারি হানল মেইতেই সপ্তাহর সাত বারর নাঙ থসিতা !উতার আগে মণিপুরে ভারতীয় সংস্কৃত /পালি সপ্তাহর সাত বারর নাঙর প্রচলন থানার সম্বাবনা বপ I উহানে R.M.Nath গিরকে মতেসেতা Indu Aryan speaker ‘কালাছা’ দাপা লোকতাকর পারর পইলাকার শাসক দাপা –সু সংস্কৃতি সম্পন্ন মানু — তানুর ধারা-নালা উতাই এবাকার বিষ্ণুপ্রিয়া মণিপুরী!
