“মণিপুরী মালঠেপ সংস্কৃতি”
মণিপুরী(বিষ্ণুপ্রিয়া/মেইতেই)গাঙ হানর অবিচ্ছেদ্য অংশহান ‘লেইফাম’ ৷মালঠেপ কেন্দ্রিক রুহি-সংস্কৃতিলই কাদা-বারার আর-আর দাপারাঙত্ত খানি তঙাল অয়া আসি!অনেক অ-মণিপুরী লেখকে এরে মালঠেপ সংস্কৃতি এহান অসামেত্ত হাচুরেসে বুলিয়া মাতেসি; কোনগই বারো গৌড়ীয় বৈষ্ণব ধর্মর প্রভাব’হান বুলিয়াও নিঙকরতারা— মর মতে এসাদে ধারণা চুম নেই ৷মাল্ঠেপ কেন্দ্রিক রুহি সংস্কৃতিলই কাদা-বারার আর-আর দাপারাংত তঙাল অয়া আসি৷মণিপুরী বিষ্ণুপ্রিয়া বারো গৌড়ীয় মেইতেই গাঙ পালয়া থাইলেই রাথা-কৃষ্ণর লেইফম আহান থায়া অওনা৷ গাঙহানর বুকগত থার লেইফাম এহান মিল্লেঙে পরবতাই যেগয়ও মণিপুরী গাঙ হান বুলিয়া চিনানি পারতরা৷ মাল্ঠেপগ, ৱালাসাংগ বারো দৌর লেইসাংগ–এরে তিনগই মণিপুরী লেইফামর অঙ্গ৷ এহান লোকতাকর পারে সৃষ্টি আসে লু-পা মণিপুরী সংস্কৃতি হান ৷
মালেম এহানর বিষ্ণুপ্রিয়া মনিপুরি বারো গৌড়ীয় মেইতেইর যেপেইত-যেপেইত গাঙ পালয়া আসি উপেইতেই রাধা-মাধবর লেইফাম আহান গাঙর হাবিয়ে তিলয়া লিংখাত করতারা: বারো যাজক মনিপুরি বামুন বহেইতারা ৷লিংখাত করেসি গাঙর মানুর বারাদেত্ত লেইশাঙর দৌর নিত্য-পূজার দায়িত্ত্ব বারো অধিকার বামুন পরিবার উহানে বংশ পরম্পরা পেইতারা ৷গাঙর মানুরেও যজেইতারা, অবশ্যই যজমানির বিনিময়ে৷ লেইশাংগর মাংকলে বাংগুড়িয়েদে শিব-লিঙ্গ থইতারা ৷দক্ষিন-মুখী লেইশাং’গর মুঙে ডাঙর মালঠেপগ (লেইফামহানর ফাম হরাগত নাইলে অনেক সময় পশ্চিম-মুখী লেইশাং ও হঙকরতারা)৷
আর-আর জাতর গৌড়ীয় বৈষ্ণবর আখড়া বারো অসমিয়া ‘নাম-ঘরেত্ত মণিপুরী লেইফাম কতহান বিষয়ে খানি তঙাল –—১)লেইশাঙে লিংখাত করতারা দৌলিশিং-দৌলাহা, ২)মালঠেপর গঠন-শৈলী বারো ৩)মালঠেপর ব্যাবহার৷
১)লেইশাঙর দৌলিশিং-দৌলাহা:- মণিপুরীর(বিষ্ণু্প্রিয়া বারো গৌড়ীয় মেইতেই )লেইফামে লিংখাত করতরা দৌ অর মূর্তির পাড়েং এহান আর-আর গৌড়ীয় বৈষ্ণবর আখারাত্ত খানি তঙল৷মণিপুরী লেইফামে রাধা-কৃষ্ণর যুগল মূর্তি , জগন্নাথপ্রভু, শ্রী চৈতন্যর মূর্তীগ বারো ৷,এছাড়া শালকিরামগ থার(ভগবানবিষ্ণুর প্রতিক শালগ্রাম শিলা)৷,এগর মালিক হুদ্দা যাজক পরিবার বা গাঙর বামুনগ ৷গৌড়ীয় বৈষ্ণবর আখারা বামুন পুরোহিত নাও থাইতরাতা থকয়া শালকিরাম নেই৷ দুৱাদে লেইসাংগর মাংকলে মুঙেদে শিব-লিঙ্গগ থইতারা বারো মাল্ঠেপগর কেন্দ্রগত আগেদে ইম্পি আগো দিলা, উগ ব্রহ্মা গিরকর প্রতিকগ(পরে ব্যাখ্যা হান দিতও) ৷ হানতে মণিপুরী লেইফামে লেইশাঙর দৌ বাদে ব্রহ্মা বারো মাহাদেবর প্রতিকগি থার৷ ‘গৌড়ীয় বৈষ্ণব’ অন্যান্য বৈষ্ণবর রাধা-মাধবর লেইফামে ‘মহাদেব’ বা ‘শিবলিঙ্গ’ না-থইতারা: মণিপুরী লেইফামে মহাদেব-গিরকরে বাধ্যতা মূলক লিংখাত করানি এহান ,নিঙেঅর প্রাক-গৌড়ীয় যুগর শৈব ধর্মনিদর্শন হান ৷ (গাঙর দৌর লেইফাম হান বাদেও প্রায় হাবি মণিপুরী গাঙ/লয়াত মাহাদেব গিরকর থলি দেহিয়র ৷আগেদে বন-সেংকরিয়া বসতি স্থাপন করতে কাদা-বারার সিনা-ফামে ডাঙর গাছ-বিরুক/হিল-পাথর থাইলে ফাম-উহান ‘লামর দৌ’গর ফাম’হান বুলিয়া নিঙ করলা ৷উপেইত থার দৌ-উগরে কুন-পেইত ‘কালঠাকুর’ ,’কালভৈরব’ ,’মহাদেবগিরক’এসাদে নিঙ-করতারা – শিব-লিঙ্গও লিংখাত করতারা ৷দৌএ ধরতাই বুলিয়া কাদা-উগতে দিনে-পহরেও আখালা-আখুলি মানু নাগেলাগা৷এবাকাও হাবি মণিপুরী লয়াত এসাদে ‘লামরদৌ’র ফাম আসে ৷’বিষু’ পালয়া নুওয়া বসরর পইলা গাঙর ইমা-ইন্দল-বেয়াপা হাবি পুলয়া এই-পাত কাত্করিয়া লামরদৌর পূজা-হান দিতারাগা৷যাজক বামুনগ না-থাইলেও এপেইর দৌএগরে পূজা দেনা য়াকরের — এসাদে লেইফামে বামন-বৈষ্ণব না-থাইতারা৷এহান নিঙে অর আদিম সর্ব-প্রানবাদী ধারনাত্ত আহেসে শৈব-ধর্মর নিদর্শণ আহান৷মহাদেব গিরক মূলতঃ বৈদিক দৌগ নাগই- অনেকর মতে বৈদিকযুগ লমৈতেগা ঋক বেদর “রুদ্রদেব”র লগে সামসে দৌগ৷ মহাদেব গিরক মণিপুরীর লোক-ভাবনার লগে জবর লু-য়া নাপসে লোক-দৌ’গ৷)
২) মালঠেপরগঠন-শৈলী:-
মালঠেপ-লেইফামর গজে ভিত্তি করিয়া শাতসে মণিপুরীর লু-পা রুহি-বৃত্তি এহানই মন্ডপ সংস্কৃতি হান ৷ য়ামপারাই নিঙকরতারাতা— ‘মণিপুরীর মালঠেপ কেন্দ্রিক রুহি-সংস্কৃতি রাধা-কৃষ্ণ ভিত্তিক গৌড়ীয় বৈষ্ণববাদ ইলয়া সৃষ্টি অসে বারো ইঙাল –ঙালসে’– এসাদে নিঙকরানি চুম নাইব ৷ বিভিন্ন ধর্মীয় সম্প্রদায় বারো জাতির(লকেই)ধর্মীয় প্রতিষ্ঠান বা উপাসনা কেন্দ্রর ব্যবহারর সীমাবদ্বতা আসে ৷ধর্মোপাসনা বারো ধমীয় অনুস্ঠান বাদে ব্যাপক প্রয়োজনে ব্যবহার না-করতারা ৷ কিন্তু মণিপুরী সমাজ-জীবনর পাপ হান লেহে মালঠেপ নাপয়া আসে, এগ এরাদিয়া মণিপুরী সমাজ-সংস্কৃতি সম্পর্কে খাল’করানিই অসম্ভব ৷ ধর্মীয় কর্ম-কাসা হুদা নাগই – হাবি ধরনর সামাজিক কর্মে মালঠেপগ প্রয়োজন ৷ ধর্মীয় অনুষ্ঠান ছাড়াও খেলা-ধুলা,সামাজিক বিচার,আলোচনা সভা, এলা-নাসা, বিভিন্ন প্রতিযোগিতা –এসাদে সামাজিক ক্রিয়া-কর্ম মালঠেপে মুর্তিপালর ৷ দসু, গিল্লা-কাঙশেই এতা মালঠেপেই খেলতারা৷ আগেদে হাবি লেইফামেই গাঙর বেয়াপার পাজি-কাটানি,ফুতিবুনানি –এসাদে কুলি-কাটুনির ফাংনা মালঠেপে করলা ৷ এগ হুদা দৌর লেইফামহান নাগই –গাঙর হাবি অংশর মানুর মিলন-কেন্দ্র’গ ৷ নিঙে অর আদিম গোষ্ঠী-জীবনর সামাজিক মিলন-ক্ষেত্র উহান কেন্দ্র করিয়াই এব্বাকার মণিপুরী মন্ডপ সংস্কৃতি ৷
কুমেই-কীর্ত্তনে মাল্ঠেপে বহানির শিজিল:– বিষ্ণুপ্রিয়া মণিপুরী কুমেই-পিয়ম বারো ধর্মীয় কর্ম-কাসা মূর্তিপালর উবাকা বার্তন পেয়া আহিতারা দর্শক গিরি-গিথানির বহানির ফামর সিজিল আর-আর লোক-সমাজর কর্ম-কাসাত্ নাদেহিযার ৷বামুন- পণ্ডিতে এহানর বৈষ্ণবীয় তত্বর য়ারি দিলেও, আর-আর জাতর গৌড়ীয় বৈষ্ণবর কর্ম-কাসাত্ত য়ামপারা তঙাল ৷ মণিপুরী মালঠেপে মূর্তিপালর কুমেই-পিয়ম বা কর্ম-কাসার মূল মঞ্চগ ‘গর্ভগৃহ’গ –যেগ মন্ডলীগ বুলিয়া মতিয়ার ৷এগ বেরেয়া আসে চারিয় বারার ফালু-চারিয়হান দর্শক/ভাবক বা শ্রোতা বহানির ফাম ৷ থাইনাকার কালেত্ত বহানির সিজিল এহান জবর ঙকখী করিয়া লেপ’করেসি ৷ ফামর সিজিল:— (A)বামুন / ব্রহ্ম-সমাজ বহানির ফাম—নৈরঋত কুনাগ, (এগরে “চেকাপর”কুনাগ মাত্তারা) A1)কীর্তন মাপু(নিত্যানন্দ সাকপাগ/প্রতিকগ),A2)গদ্দীর মাপু,A3)আর-আর বামুন!(B)শাস্ত্রজ্ঞ পন্ডিতর ফামহান, (C)নাম ভাবক C1)নৈরঋত কুনার নামভাবকর ফামহান(কেশব সাকপাগ এগই ‘মইপংধারীগ),C2)বায়ুকুনার নাম ভাবকর ফামহান(হনুমান সাকপাগ),C3)অগ্নিকুনার নামভাবকগ(গনেশ সাকপাগ)বারো C4)ঈশানকুনার নাম ভাবকর ফামহান(অনন্ত সাকপাগ)C5)পিঠির ফালুর হাদি মেরাকে বাতেদেও নামভাবক আগর ফাম আসে(উগ মাধিবেন্দ্রপুরি সাকপাগ)!(D)গজর থাকর মানুর ফাম –D1)রাজার ফামহান(পিঠির ফালুত মুঙেদে মুঙদিয়া বহের),D2)লেম্পা রাজার ফামহান(দক্ষিনর ফালুর হাদি-মেরাকে খানি পিঠিয়েদে),D3)ঈশান কুনাগত পিঠিয়েদে মুঙহান দিয়া ‘কৈরেঙ খুল্লাকপার’ফামহান!(E) মুঙরফালু হানর হাদি-মেরাকে পথগ (কুমেইত ক্ষোম্মামফাম বহেইলে ফুতিআহান(পর্দা)টাঙতারা)সম্ভাষাগর অধিকারে থার ফামহান ,–সম্ভাষা গিরক ‘রাগ’গত্ত ‘গৌড় বিশ্রাম’পেয়া ‘শিবানন্দ’ সাকয়া থার, এর পরে ‘নারদ সাকপাগ’)!(F)আড়ঙফামহান (সেবারীফামহান):= সেবারি দুগ থাইতারা “বৃন্দা দেবী”লেই-চন্দন দের উগ বারো “তুলসীদেবী”পানা-তাংখা বিলার উগ!(G)অজারেল ফামহান – G1)পইলাকার(প্রথম)পালার অজারেল,G2)দ্বিতীয় পালার অজারেল,G3)তৃতীয়/আর-আর পালা অজারেল বহিতারা/জিরেইতারা উহানে ফালু এহানরে “অদ্বৈতর ফালু” হান মাত্তারা ৷পিঠির বারো উত্তরর বাকি অংশ উহান (H) ইমা-ইন্দল বেয়াপার হান ৷ উত্তর বারো মুঙেদর ফালুর বাকি অংশ উহান (I)বুজনর (মুনি)কাদাগ ৷
ক্ষোম্মামফাম :- এহান পাদ প্রক্ষালন বা জাঙ ধনার ফামহান – কুমেই কীর্তনে মালঠেপগর আড়াঙগত বা গান্টাগত উত্তরেদে মুঙ দিয়া ক্ষোম্মামফাম হান বহেইতারা ৷ এপেইত মহাদেব গিরক পালয়া থার ৷ শিবলিঙ্গগ মহাদেবর প্রতিক্গ, ঋকবেদে মহাদেবর অস্তিত্ব নেই,–দ্রাবিড়ীয়দৌগ বুলিয়া য়াম্পাই নিঙকরতারা,তবে হিমালয়ান মঙ্গলোয়েডরমাও মহাদেবর উপাসনার নিদর্শণ আসে!সিন্ধু সভ্যতার ধবংসাবশেষে পশুপতির মূর্তিপাসি –অনেকেই নিঙকরতারা আদিম সর্ব-প্রাণবাদী বিশ্বাসেত্ত ভারতে মহাদেব বা শিবর উপাসনা আরম্ভ অসে ৷ নিঙে অর আদিম প্রজনন ধর্মী ভাবনাত্ত লিঙ্গ পূজা ভারতবর্ষে আরম্ভ আসে ৷ মনিপুর সহ সমগ্র দক্ষিন পূর্ব এশিয়াত লিঙ্গ পূজা শৈব উপাসনার নিদর্শন আসে ৷(মালঠেপর Ground Map হান) 
