IBBMA.NET

লেইরাপা সমাজ এহান আজি কি অবস্থা আহানাত পরেগেছিগা কুপকরে খালকরলে গারিররম
উবা অর । টাউন বাড়িয়েদেত্ত আহিথম বুলেয়া গাঙ-ঘরেদে মিল্লেঙ দিলে চিত্রগ নিয়াম খুতিথিয়য়া নজরে পড়ের । জনসংখ্যার মূল অংশর মানুতে গাঙ-ঘরেদেই বসতি । এহান হাব্বি জাতি গোষ্ঠীর ক্ষেত্রেই বাস্তব বিষয়হান । আর আর জাতির মানুর সামাজিক-সাংসারিক দূরবস্থা যেতা দেহাদেছে হাবিতাত সমান ভূক্তভোগী আমার মানুউ । কিন্তু তুলনাত নিয়াম হুরকাঙ আমার কমিউনিটি এহানর দূর্গতি আরাকউ ডাটয়া দেহা দেছে । শিক্ষা-সংস্কৃতি-আর্থিক অবস্থা এহান আজিকার দিনে যতহান আগুয়েয়া যানা থকছিল, কিন্তু আমারতা জবর পিঠিত পড়িয়া আছি । দুনিয়াজুড়া আজিকার অবাধ বিশ্বায়নর যুগ এহানাত থতালতে মাতানি অর, আজি মনেইলে হাব্বিয়েই নিজর নিজর অগ্রগতি করানির পথ হাবি খোলা । কিন্তু কার্যতঃ কি মনেইলমত আগুয়েইল উপায় আছে ? অগ্রগতির বেলায় বেয়াপা-মুনি সমান অংশীদার-ভাগীদার বুলিল এহানর সারবস্তু কি অউসাদে সমাজে ফলেছেতা ? এবাকাউ মানবিক হাব্বি অধিকার পানা সম্ভব অরতা ? মুঙে পথ খোলা থাইলেউ সুযোগ-সুবিধা নিয়া শিক্ষা-দীক্ষা অর্জন সম্ভব নার । চাই-চাকুরী পানার নিশ্চয়তা নেই, রোজি-পাতির পথ হাবি বন্ধ অযারগা, ক্ষেতি-বাড়ির রসদ-ফলন হাবিতা লুপ্ত অযারগা । নুয়ারা-পানির মাত্রা এতা নিয়াম অযারগা, চিকিতসার সুযোগ পানা আরো জিঙে হীনো যারগা । প্রাকৃতিক নিয়ম অনুসারে বেয়াপারতা প্রসূতিত্ত চিনকরে শারিরিক নানান মৌলিক সমস্যা, নুয়ারা-পানির চিকিতসা এতা একান্ত করে দরকারি বিষয় । এবাকাতে হাব্বি মানুরতাই নানান কঠিন নুয়ারা এতা সামাজিক ব্যাধি সাকো যারগা । ঘরে ঘরে এতা এবাকা প্রধান সমস্যা ।প্রতিকারর পথ নাপেয়া মানু দিশাহারা অযিতারাগা।আর্থিক দূরবস্থা এহানে মানুর বুদ্ধি লৌশিঙ মাঙকরেদে নেরগা, বিবেক বুদ্ধি ধ্বংস করেদে নেরগা । মানবিক মূল্যবোধ বিনষ্ট অযারগা, সংস্কৃতির সুর ছন্দহীন অযারগা । মানুর নান্দনিক প্রতিভা এতা যেমন মূল্যহীন অযারগা । জীবনর রূপ-রস-সৌন্দর্য-মাধূর্য হাবিতা যেমন হুকে যারগা । অন্যায়, অনিয়ম, দুর্নীতি এতা যেমন স্বাভাবিক বিষয় অলযারগা । অশিক্ষিতর সংখ্যা আজিকার দিনেউ বাড়ের । এমনকি শিক্ষিত বেকার যুবক যুবতীর চিন্তা পেয়াউ বিকৃত অযারগা । নানান অসামাজিক কার্যকলাপ, নেশা, বিকৃত রুচি-সংস্কৃতির প্রভাব আরো বাড়ে যারগা । সমাজর সামগ্রিক এরে যে অবক্ষয় এহান কিতা ব্রহ্মার আভিশাপে অরহান ? না আমার সমাজ-রাষ্ট্র ব্যবস্থার কল্যাণে অরহান ? সমাজ বিজ্ঞানর শিক্ষা মতে আমি উপয়ার – সমাজ বা রাষ্ট্র আহানর base বা মূল ভিত্তিহান অর্থনীতি । এ অর্থনীতির পরিপূরক রূপেই superstructure বা উপরিকাঠামো এতা হঙর, পরিচালিত অর, যেমন – রাজনীতি, শিক্ষা, সাহিত্য, সংস্কৃতি, বিজ্ঞান, দর্শন হাবিতা । এবাকার অর্থনীতিহান ক্যাপিটালিজম বা পুঁজিবাদ, যেহানর সর্বোচ্চ স্তরহান সাম্রাজ্যবাদ বা ইম্পেরিয়ালিজম, তার সর্বগ্রাসী রূপহান এরে গ্লোবালাইজেশন বা বিশ্বায়ন । এ অর্থনৈতিক ব্যবস্থাত সমাজ কল্যাণ বা সামাজিক স্বার্থ আসলহান নাগই, ক্যাপিটালিষ্ট ব্যক্তি বিশেষ বা কর্পোরেট হাউসর স্বার্থই মূল উদ্দেশ্যহান । এমনকি কল্যাণকামী বুলতারা আমার এরে রাষ্ট্র ব্যবস্থা এহানাত যেতা যেতা জনপরিসেবা মূলক ব্যবস্থা আছিল, এবাকা অউতা হাবি লাভদায়ক ব্যবসা রূপে রিলায়্যান্স, বাজাজ, টাটা, বিড়লা, গোয়েঙ্কা আদি কর্পোরেট বর্গর আতে গেলগা । এবাকা বৃটিশ বা ইষ্ট ইণ্ডিয়া কোম্পানীর শোষণ শাসন নেই, এ স্বাধীন দেশে অর্থনীতি কব্জা করিয়া এবাকাতে দেশীয় কোম্পানী এতা মাল্টিন্যাশনাল সাকইলা, পৃথিবীর দেশে দেশে তানুর শোষণর সাম্রাজ্য হঙকরিয়া হদেইলা । রাজনৈতিক দলরে রূপার ডিক দিয়া যে দলহান ভোটে জিঙে পারতারা অউ দলর নেতা-মন্ত্রীরে নাকে দড়ি দিয়া তানুর আর্থিক নীতি কার্যকর করতে বাধ্য করুয়েইতারা । হাব্বি জনপরিসেবা এতা এবাকা অরতে লাভদায়ক ব্যবসা অইল – শিক্ষা, স্বাস্থ্য-চিকিতসা, পরিবহণ, যোগাযোগ ব্যবস্থা হাবিতা । এমনকি এবাকাতে FDI করিয়া খুচরা ব্যবসায়ী বারো লেইরাপার ক্ষেতি-বাড়ি-মাটি পেয়া কব্জা করানির ফন্দি অয়া হদেইল । “রাজনীতি বারো ধর্ম” এ দ্বিয়হান মানুরে বিভ্রান্ত করানির প্রধান আতিয়ার রূপে ব্যবহার করতারা ।

শিক্ষা বারো চেতনা দ্বিয়হানরে কর্তাবর্গই জবর ডরপেইতারা । কারণ, বিবেকজাগ্রত মানু বুক ফুলেয়া উবা অনা পারলে বন্দুক-কামান হাবি তুচ্ছ অর, এসাদে গণজাগরণ যদি গণ অদ্ভুত্থানর সৃষ্টি করের, গণ বিপ্লবর আঘাতে পৃথিবীর কত দেশর অত্যাচারী বজ্রকঠিন শাসন ব্যবস্থা পেয়াউ ঐক্যবদ্ধ সচেতন মানুয়ে উলট-পালট করেদেছি ইতিহাস আছে । অউহানল এবাকার পুঁজিবাদ-সাম্রাজ্যবাদ এক্ষেত্রে যবর সতর্ক । বৈজ্ঞানিক-ধর্মনিরপেক্ষ-গণতান্ত্রিক শিক্ষার বদলে ধর্মীয় চিন্তার পৃষ্ঠ পোষকতা, কারিগরি শিক্ষার ব্যবসা এতাল যন্ত্র-মানব হঙকরে নিতারাগা । মানুরাঙ আর মানবিকতা, আদর্শ, ন্যায়-নীতি-মূল্যবোধ এতা থাইল দরকার নেই যেমন, কারিগরি দক্ষতা অইলেই যেমন শিক্ষার স্বার্থকতা, আর কোনতা না লাগের । আগদে ভগবান,আল্লা বা গড থাইলেই লমইল বারো আরাক আগদে যত অপসংস্কৃতি, কু-রুচি, অত্যাচার-অনাচারর সমুদ্রহানাত তরুণ-ছাত্র-যুবক হাতুরকা !মেরুদণ্ডহীন অয়া থাকা, যাতে অন্যায়র বিরুদ্ধে মুর তুলে নুয়ারবাতা । অপূর্ব এরে দ্বিয়হানর সহাবস্থান অক বুলিয়া পিঠিত যত রূপার যুগান দেনা লাগের কর্পোরেট হাউসে আত দ্বিয়হানি উবুরি করেইতারা । মবাইল, কম্পিউটারেত্ত চিনকরে যত প্রচার মাধ্যমে নুংরা অপসংস্কতির, পরনগ্রাফির  অবাধ বিতরন ! কারন মানুরে বিভুলা নাকরলে, মোহগ্রস্ত নাকরলে অন্যায়, দুর্নীতির রাজত্ব টিকে নুয়ারের । কিন্তু কাকস্য পরিবেদনা । এবাকা অনেক শিক্ষিত মানুয়ে পেয়া এরে সত্য কথাহানি বুক ফুলেয়া মাতানির হিম্মত জুটা নুয়ারতারা । কোনো না কোনো ভাবে গোলামী, ইমে মুরনঙেয়া থানার প্রবনতা । হয়ত চাই-চাকুরীর দায়ে, নাহয় কর্তা লকেইর বিরাগ ভাজন অয়া ভবিষ্যতে সুযোগ-সুবিধা হারানির ভয়ে । এমনকি নিজর এরে দুর্বল অবস্থান জাস্টিফাইড করতেগা আরো উল্টা যুক্তি পেয়া করতারা অনেকগই । এতে সমাজর-সাধারণ মানুর অমঙ্গল আরাকউ দীর্ঘায়িত অর ।

কিন্তু সত্য অউহানরে নিয়াম দিন গুরিয়া থপারিলহান নাগই । মিঙালে পহর অইলেই আধার এহান মাঙর । রাতিকার আধারহান যতউ গভীর অক, মুঙে মিঙালহান বাসেয়া থার । বিয়ানহান ফুয়েইলেই, বেলিহান নিকুললেই চারিয়বারা ইঙাল ঙালর। মানুরাঙ চেতনা এহান অবশ্যই আইতই, হাবিহান সচেতন অইতাই আকদিন সইনেই ।