গোপীমোহন মুখার্জি : শ্রদ্ধাঞ্জলি আহান
কাঞ্চনবরণ সিংহ
গোপীমোহন এইগা পুল্লাপ আধুনিক মানু আগ যেগ তার চিন্তাল মননল ব্যবহারল সম্পূর্ণ স্বতন্ত্র অয়া উঠেসিল আরতারাংত, প্রভাবিত করেসিল সময়হানরে, নিজর বার পিসেকার প্রজন্মরে। ব্যক্তি আগ যেবাকা মানুর কল্যানর সালে কাম করিয়া যারগা, কামর তুল তার জীবনযাপন, সামাজিক বোধ বার দায়বদ্ধতা, মানবিক দিকহানি বার চারিত্রিক বৈশিষ্ট্য, সহানুভুতিশীলতা- এতা হাবির সমন্বয়ে ঔ ব্যক্তি উগ এমনো ব্যক্তিত্ব আহানাত পরিণত অর যেপেইত তার মরণ ডাঙর শূন্যতা আহান আনিয়া আহের যেহান সহজে ভাষাল প্রকাশ করে নুৱারিয়ার। মালেমহানরে আহিরপানিত বাহুৱেয়া অপূরণীয় ক্ষতি থয়া যারগা। গোপী এইগা ঔসাদে ব্যক্তিত্ব আগ আসিল।
১৯২৩ ইংরেজির ৩০ ডিসেম্বর তৎকালীন অবিভক্ত শ্রীহট্ট জিলার করিমগঞ্জ মহকুমার হিংগালা পরগণার পাচডালি গাঙে গিরকর জরম। বাপক কুঞ্জলাল মুখার্জি বার মালক থাম্বৌ মুখার্জি। প্রাথমিক শিক্ষা রাজারবাজার প্রাথমিক বিদ্যালয়গত। ১৯৪৫ এ করিমগঞ্জ সরকারী বিদ্যালয়গত্ত ম্যাট্রিক পাশ। ১৯৪৬ এ এইগা সিলেটর মুরারীচান্দ কলেজে ভর্তি অসিল। কিন্তু দেশবিভাগর বেরাগাঠুনিত শ্রীহট্ট গণভোটর আগে করিমগঞ্জ শহরে আলয়া আহিল। বার করিমগঞ্জ কলেজে ভর্তি অইল। এইগা করিমগঞ্জ কলেজর ছাত্র সংসদর প্রথম নির্বাচিত সাধারণ সম্পাদকগ। শিক্ষাগুরু প্রখ্যাত কবি অশোকবিজয় রাহা। ঔ সময় এইগা বামপন্থী ভাবাদর্শে প্রভাবিত অইল বার কমিউনিজমে দীক্ষা নিলগা। দ্বি শতাব্দীর ব্রিটিশ সাম্রাজ্যবাদর আতেত্ত হব্বে স্বাধীন ভারতর শিক্ষিত যুবকসৌগ বসর আহান পিসেদেই জড়িত অইল সক্রিয় রাজনৈতিক ক্রিয়াকলাপে । নাহ সস্তার রাজনীতিত গই! বঞ্চিত লাঞ্চিত মেয়েক নাদেহেসি শ্রমজীবী বার বি-নেই ক্ষেতি উলার স্বার্থে নিজর জনমহানরে জীবনহানরে বার ঙাল ভবিষ্যতহানরে উৎসর্গ করল। তৎকালীন রাজদন্ডগর বিরুদ্ধে উচ্চারণ করল ঔ দেশহান নিক্করুৱাসিল মন্ত্রহান- য়হ আজাদি জুঠা হ্যায় । পার্টি বার গণসংগঠন সারা ভারত কৃষকসভা নিষিদ্ধ ঘোষিত অইল। নিষিদ্ধ ঘোষিত সংগঠনর সক্রিয় কর্মীগ হিসাবে এইগা আত্মগোপন করল করিমগঞ্জ মহকুমার বন-টেঙারার গাঙে। হিংস্র জীবজন্তু পকজকর ডর তুচ্ছ নিংকরিয়া কঠিন লালফামে কাকেই কারল।
গোপী এইগারে উবাকা রাষ্ট্রর আতে তুলে দেনারকা পুরস্কারমূল্য ঘোষিত অসিল। তানুরে দেখলেই উবাকা গুলি চালানির সরকারী নির্দেশঔ আসিল। মিথ্যা অভিযোগল পুলিশী নির্যাতন, স্বাধীনতার নাঙে শোষনযন্ত্রর হস্তান্তর-চব্বিশ বসর বয়সী গাউরাপাগর অভিজ্ঞতাহান। স্বাধীনতার নাঙে ক্ষমতার হস্তান্তরর পিসেদেই দেহা দেসিল সংখ্যাগুরুর য়াত দাপার বিভিন্ন ধর্ম–ভাষা-র জনগোষ্ঠীর গজে আগ্রাসন দমন পীড়ন, যেহানে ভাষা বার সংস্কৃতির যে ধংস্বোন্মুখ পরিস্থিতিহান সৃষ্টি অসিল ঔহান মোকাবিলা করানির কঠিন সংগ্রামে এইগা জাবুর দেসিল। ১৯৫২ এ সরকারে কমিউনিস্ট পার্টির গজে নিষেধাজ্ঞা তুলে দিলে এইগা স্থায়ী অয়া ঘরে থানা অকরল। প্রতিষ্ঠা করল রাজারবাজার এম. ই. স্কুল। ভাষানেই আশানেই লাঞ্চিত বঞ্চিত বেইবুনির সালে ভাষা সংখ্যালঘু দাপার শিক্ষিত মানু আগ হিসাবে এইগাই আদারে গুমজিয়া আসি সমাজহানরে পথগ দেহুৱাসিল-যে পথগত পিছলন আসিল, মসৃণ নাসিল। বিষ্ণুপ্রিয়া মণিপুরী ঠারে প্রাথমিক স্তরে শিক্ষা পানার সংবিধানিক দাবীহান পইলা এইগাই তুলেসিল। অকরাগ অইল আরাক সংগ্রাম আহানর। ঔ সংগ্রামর পথ প্রদর্শকগ এইগা। আমার প্রগতিশীল গণতান্ত্রিক চিন্তা চেতনার উন্মেষ অসিল এইগার চিন্তা চেতনার মনন সকয়া। এইগা মহাসভার ঐতিহাসিক চতুর্দশ আন্দুরগাং অধিবেশনর মাস্টার ব্রেইনগ বুলিয়া খ্যাত যে অধিবেশনহানাত প্রাথমিক স্তরে স্কুলে বিষ্ণুপ্রিয়া মণিপুরী ঠারহান চালু করানির দাবী জানানি অসিল। উহান ছাড়াও বিষ্ণুপ্রিয়া মণিপুরী সাহিত্য পরিষদ, বিষ্ণুপ্রিয়া মণিপুরী ভাষা পরিষদ, বিষ্ণুপ্রিয়া মণিপুরী সংস্কৃতি পরিষদ, বিষ্ণুপ্রিয়া মণিপুরী অর্থনৈতিক পরিষদ গঠন করানি অসিল। প্রথমবাররকা আমার ঠারর পত্রিকা প্রকাশ করানির ব্যবস্থা গ্রহন করানি অসিল। ঔবাকা ১৯৫৫। এইগা মহাসভার সাধারণ সম্পাদকর দায়িত্ব গ্রহণ করেসিল।
শিক্ষার ক্ষেত্রগত ১৯৫৩ ইংরেজিত এইগাই চান্নিঘাট মডেল এম.ই স্কুল প্রতিষ্ঠা করেসিল। ১৯৭৭ ইংরেজিত এইগার ঐকান্তিক হত্নাই ঔ স্কুল উগ উচ্চ মাধ্যমিক বিদ্যালয়ে রূপান্তরিত অসিল। ১৯৮৮ ইং এইগা অবসর গ্রহণ করেসিল।
সাহিত্য সংস্কৃতির ক্ষেত্র হানাতৌ এইগাই উল্লেখযোগ্য অবদান থয়া গেসেগা। ১৯৪৭ ইং করিমগঞ্জ শহরেত্ত প্রকাশিত বাংলা ভাবী পত্রিকার সম্পাদকগ আসিল। এইগার আমার ঠারে প্রকাশিত প্রথম কাব্যহান এবাকার এলা (১৯৫৪)। এইগাই কতহান নাটক ইকরেসিল বার মঞ্চায়ণ করুৱাসিল। নাটক উহানি- মেইঙালহান (১৯৪৯) ইজ্জু পথগ (১৯৫৬) কনাক-বুজন (১৯৫৭) জমির মালিক (১৯৫৯) হুনিয়া পেট বুজানি (১৯৬২) চন্দ্রজিনি (১৯৭০) এই পথে (১৯৮১) সমাধান (১৯৮৭) ইত্যাদি। গিরকর উল্লেখযোগ্য প্রবন্ধ সংকলনহান- আমার এবাকার চিন্তা ; আমার ঠারে প্রকাশিত একমাত্র সমাজতত্বমূলক প্রবন্ধ সংকলনহান।
১৯৪৮ এ অসম বিধানসভাত গোপীনাথ বরদলৈর নেতৃত্বত গৌহাটি বিশ্ববিদ্যালয় বিল পাশ করুৱেয়া অসমে সংখ্যালঘু দাপার ভাষা বার সংস্কৃতির গজে সংখ্যাগুরু অসমিয়া দাপার যে আক্রমণহান সংগঠিত অসিল ঔহানর বিরুদ্ধে ‘ভাবী’ প্রগতিশীল গোষ্ঠীহানল প্রতিবাদ করেসিল। ১৯৫০ এ অসমে পইলা প্রথম জাতীয় নাগরিক পঞ্জীয়ন করানি অসিল। ঔবাকা এইগার ঐকান্তিক হত্নাই দুল্লভছড়ার রূপার গাঙর মানুৱে জাতর বার ভাষার পরিচয়হান বিষ্ণুপ্রিয়া মণিপুরী বুলিয়া নথিভুক্ত করুৱাসি। রাজনৈতিক আত্মগোপনর সময় এইগা নিজর গাঙে নাথায়া রূপার গাঙেই য়াম সময় থাইল। ভাষার বিষয় এহান জবর কঠিন বিষয়হান । বিশেষ করে ঔবাকা সদ্য স্বাধীন দেশ আহানাত। কিন্তু গিরক আত্মগোপনর অনিশ্চয়তার সময় উহানাতৌ আমার ভাষার বিষয় এহান যুক্তিল আলোচনা করিয়া মানুরে বুজুৱা পারেসিল। মানুৱৌ উপ পারেসিলা। ১৯৬১র বাংলা ভাষা আন্দোলনেও এইগাই সক্রিয়ভাবে অংশগ্রহণ করেসিল। ঔ প্রেরণা বার অভিজ্ঞতাল ১৯৬৮ র বিষ্ণুপ্রিয়া মণিপুরী ভাষা আন্দোলনে নেতৃত্ব গ্রহণ করেসিল। ১৯৮১ ৎ বিষ্ণুপ্রিয়া মণিপুরী সেন্সাস কমিটির সভাপতিগ হিসাবে এ ভাষিক সংখ্যালঘু জনগোষ্ঠীর সঠিক পরিসংখ্যানহান সমীক্ষা করিয়া সরকারর মুঙে তুলিয়া ধরেসিল। ১৯৮৪ৎ মহাসভার সভাপতিগ নির্বাচিত অসিল। পিসেদেও বার আরাক আকখুরুম সভাপতিগ অসিল। ১৯৮৮ ইং করিমগঞ্জ জিলার পক্ষৎত এইগারে কৃতি শিক্ষক সম্বর্ধনা জানানি অসিল। ২০০১ ইং শান্তি বার সম্প্রীতি রক্ষার ক্ষেত্রগত বিশেষ অবদানর স্বীকৃতি স্বরূপ করিমগঞ্জ জিলা উপাযুক্ত গিরকে এইগারে বিশেষ সম্বর্ধনা জানাসিল। ২০০৮ইং রাতাবাড়ি থানাধীন অঞ্চলে শিক্ষা প্রসাররকা বিষ্ণুপ্রিয়া মণিপুরী সাহিত্য সংস্কৃতি একাডেমিয়ে এইগারে ‘তনুবাবু স্মারক সন্মান’ এ সন্মানিত করেসিলা। ২০১১ ইং সিংলা অঞ্চলর হাবি থাকর মানুর পক্ষৎত এইগারে গণ সম্বর্ধনা জানানি অসিল।
আকবেদেত্ত বিপ্লবী-স্বাধীনতা সংগ্রামী-শিক্ষাব্রতী-লেখক-সমাজচিন্তক-সমাজকর্মী-সংগঠক-মানবতাবাদী-মহাসভার আধুনিক রূপকার গোপীমোহন এইগা আসলেতে উদারচেতা আবেগিক বার কঙালা মনর মানুগ আসিল। গেলগা ১৮ অক্টোবর ২০১৪ এইগাই লমইলগা নিংশাহান এরে দিল। এইগার প্রয়াণে আমি শোকস্তব্ধ। এইগারে আমার হমা, শ্রদ্ধা বার বানানুংশি জানেয়ার।
