কবি ব্রজেন্দ্রকুমার সিংহ গিরকর জীবনবৃত্তান্ত
সুশীলকুমার সিংহ
বিষ্ণুপ্রিয়া মণিপুরি সাহিত্যর হাকহানাৎ উজ্জ্বল নক্ষত্রগ আগ অয়া আবির্ভূত অসিল কবি ব্রজেন্দ্রকুমার সিংহ। পইলাদে বাংলাল সাহিত্যচর্চা করলেউ পিসেদে বিষ্ণুপ্রিয়া মণিপুরি ঠারর সাহিত্যর ফালুহান ঙালকরিয়া থাইল, এরে ফালু এহান আর না এরাদিল। কবিতা বপকরে ইকরলেউ নাটক, গল্প, রম্যরচনা, প্রবন্ধ, এলা, ব্যাকরণ কিত্তাউ বাদ নাদেসে। বুলে পারিয়ার ব্রজেন্দ্র গিরক আমার সাহিত্যর সব্যসাচী লেখকগ। ধনঞ্জয় রাজকুমার ছদ্মনাঙে অনুবাদ করেসে নানান ভাষার কবিতা। গিরকে কবিতা অনুবাদর মাধ্যমে আমার পাঠকরে বিশ্বকবিতার লগে পরিচয় করাদেসে, লগে আমার সাহিত্যহানরেউ চাঙখল করানির হন্না করেসে।
কবি ব্রজেন্দ্রকুমার সিংহ গিরকর জরম ১৯৩৮ সালর ১২ ফেব্রুয়ারি তারিখে, আসামর কাছাড় জেলার পাকইপার গাঙে। বাপকর নাঙ ব্রজলাল সিংহ বারো মালকর নাঙ নীলমঞ্জুরী দেবী। বাপক পুলিশ বিভাগে চাকরি করেসিল। ১৯৫৬ সালে গৌহাটির সিলভার জুবিলি হাইস্কুলেত্ত গিরক ম্যাট্রিক পরীক্ষা পাশ করেসিল। ১৯৫৮ সালে শিলচর গুরুচরণ কলেজেত্ত আইএ, ১৯৬০ সালে অর্থনীতিল বিএ অনার্স বারো ১৯৬২ সালে কলিকাতা বিশ্ববিদ্যালয়েত্ত এমএ ডিগ্রি অর্জন করেসে। ১৯৬৩ সালে হাইলাকান্দি এসএস কলেজে অর্থনীতির প্রভাষকগ হিসাবে কর্মজীবন অকরেসে। ১৯৯৯ সালে অধ্যক্ষ ঔ কলেজ উগর অধ্যক্ষগ হিসাবে অবসর গ্রহণ করেসে।
১৯৬৫ সালে ব্রজেন্দ্র গিরক শিলচরর মাছুঘাটর বিশিষ্ট সমাজসেবী কৃষ্ণকুমার দেববর্মার জিলক সুখদা সিংহরে লোহঙ করেসিল। সুখদা গিথানকৌ একিন সমাজকর্মী আগ আসিলি। ব্রজেন্দ্র গিরকর জিপুত তিনগ। নিঙল আগ, মুনি দুগ। জেঠি নিঙল মণিদীপা সিংহ গৃহিণীগ, শিলচরে লোহঙ অসে। থাংনাত মণিময় সিংহ, ব্যবসায়ী আগ। হাবির খুলাগ অইলতা মণিরূপ সিংহ, কম্পিউটার ইঞ্জিনিয়ারগ, এবাকা সিঙ্গাপুরে থার।
সাহিত্যকর্মর স্বীকৃতি হিসাবে নিয়ামপারা পুরস্কার বারো সংবর্ধনা পাসে কবি ব্রজেন্দ্র গিরক। উল্লেখ করানির সাদে কতহান পুরস্কার বারো সংবর্ধনা তলে দেনা অইল: আকাশবাণী শিলচরেত্ত সংবর্ধনা, বিষ্ণুপ্রিয়া মণিপুরি রাইটার্স ফোরাম, ভাষাশহিদ স্মারক সমিতি, দৈনিক যুগশঙখত্ত সংবর্ধনা, নাকু অজা ফুনেই পণ্ডিত পুরস্কার, রুহিবৃত্তি শিংলুপ পুরস্কার, মহেন্দ্র মেমোরিয়াল পুরস্কার, পৌরিত্ত আজীবন সম্মাননা, মণিপুরি থিয়েটার সম্মাননা ইত্যাদি। প্রকাশিত লেরিকর তালিকা: বাংলা: ভিখারি বালকের গান (কাব্য), ত্রাণশিবির (নাটক), উত্তরা, বাংলা ছন্দ পরিচয়। বিষ্ণুপ্রিয়া মণিপুরি : চক্রবৃদ্ধি (নাটিকা), লেহাও ফুলগরে, এলার খুৎতল, ধ্রুবপদ, মেরাক সেরাক, কণ্ঠগিরো (নাটিকা), বিরহী যক্ষর এলাহান, জিনজিনি, পৌরেই (সম্পাদিত), রসবিলাস, চিকংলেই, সিকাডেইনি (গল্প), বি. মণিপুরি ছন্দ পরিচয়, আহির পানির পথগ, ফিরাল, জার্নাল, টৌনাটিং, সুদর্শনচক্র, ঠকর কাঠি, রচনা সংগ্রহ। ধনঞ্জয় রাজকুমারর লেরিক: রুবাইয়াত ই ওমর খৈয়াম, মিকুপর চেরিফুল, হপনর বাবুয়ানি, কিমে অয়া আছৎ ইকাইতাপি, লক্ষ্মী গিথানক, ভিক্ষা দেনে এরে আহিগিতৌ, কুরৌ আহান রবীন্দ্রনাথ, জোনাকহান বারো কুসুমলেই, দুঃখ মাচুর হমাজক, রাজপ্রশ্ন, কালিদাসর মেঘদূত, ডিগল আতহানল মোরে, ওইদিপউস, মাতনেই কইনার পালাহান, ডাকঘর, অনুবাদকল্প ১ম বারো ২য় খণ্ড, কবিতা সমগ্র। ২০১৯ সালর ৩১ আগস্ট তারিখে বিষ্ণুপ্রিয়া মণিপুরি সমাজহানরে দুঃখর সাগরহানাত বাহুয়েয়া কবি ব্রজেন্দ্রকুমার সিংহ গিরক নিত্যধামে প্রবেশ করলগা।
