‘ইঞ্চৌ’ –  মনিপুরর থাইনাকার পুষারাকপা ঘর

গেদে মণিপুরীয়ে(বিষ্ণুপ্রিয়া/মেইতেই)পূর্বমুখী ডিগালি বাসগৃহ আকতা হঙকরলাউতা ইঞ্চৌ  এবাকাও ভিতরখুলর মণিপুরী গাঙেদে আগো-দুগো আহিত পরের। হাকতাক আহানাত বার্মাত্ত অকরিয়া সিলেট পেয়া মণিপুরীর(মেইতেই,পাঙাল বারো বিষ্ণুপ্রিয়া)গাঙেদে ঈঞ্চৌ এতা য়ামঅয়া অসিলরর অংতা-লাক্তা দেহিয়াই মণিপুরী গাঙহান চিনলা। প্রত্যেকগ মণিপুরীয়েই ঈঞ্চৌ আগত ঝিয়া-ঝিপুত নাতি-নাতল হাবিরেল বেমলবেঠা অয়া থানার আশা-পুংনিং থইলা
ইংরেজ ওয়ারিউল্পা আগই ইঞ্চৌগরে নাগা ঘর বুলিয়া মাতলেও য়ামপারাই উহান নাকর তারা হাবির মতে এগ মণিপুরী Traditional ঘরগএবং উহানেই হাবিয়ে য়াকরেসি। কিয়াকা বুললে ঈঞ্চৌগর লগে মণিপুরীর থাইনাকার ধর্মবোধলোকবিশ্বাসজীবনচর্চ্চা  বারো রুহীবৃত্তি লুয়া নাপসে।
থাইনকার(প্রাচীন)মণিপুরর ওয়াইগ য়ুমচৌএবাকা মেইতেইয়ে  যুমজাও বারো বিষ্ণুপ্রিয়া মণিপুরীয়ে
 ‘ইঞ্চৌ’(ইম্চৌ)বুলতারা। ‘য়ুমচৌ’(য়ুম+চৌ)অর্থ ‘ডাঙর ’, য়ুম=চৌ=ডাঙর।অনেক পণ্ডিতে এগ’ Tibeto-Burman ওয়াই বুলিয়া মাতলেও পন্ডিতরাজ আতম্বাপু শর্মা গিরক সহ য়ামপারাই প্রাকৃত শব্দগ বুলিয়া মাতেসি। সংস্কৃত গৃহম পালি গিয়ুমàয়ুম মানে ঘর(জীব-জন্তু পক-জক য়ময়া থাইতারা ফাম উহান বিষ্ণুপ্রিয়া মণিপুরী ঠারে যম হান মাততারা, য়ম বারো যম ওয়াই দ্বিয়গর গুড়িগ আকগ) ‘চৌ’ মূলত বিশেষণগ হিন্দী বারো মৈত্থিলী চৌড়া, বাংলা চওড়া, মারাঠি  চৌপট্টা, উড়িয়া  চউডা  মানে ডাঙর বা বিস্তৃত সমতল ভূমি নিঙে অর এতার বারো ‘য়ুমচৌ চৌ র গুড়িগ  আকগউহানে আতম্বাপু শর্মা গিরকে প্রাকৃত ওয়াইগ বুলিয়া মাতেসেতা ইঞ্চৌর ব্যুত্‍পত্তি বিশ্লেষণ করলে হারপেয়ার এগ মণিপুরে হঙসে প্রাকৃত শব্দগ।
থাইনাকার মণিপুরর মানুর লোকবিশ্বাস হান  ইঞ্চৌ এগ ঘরর রাজগ। ঘরগর মূল থ্ংচিল হান মুঙেদে বারো পিঠির থ্ংচিল হান উত্তরেদ থইলা, মুঙর থ্ংচিল হান খানি ডাঙর(মণিপুরীর লোক বিশ্বাস আহান দক্ষিনেদে  থ্ংচিল থানা গমনেইউবেদে থ্ংচিল থার উগ দৌর সাংগ)পূর্ব-পশ্চিমে ডিগলা করে হঙকরলা, চারি চালর ঘরএগর খিলকির সংখ্যা য়াতইলমুঙেদে বারো দক্ষিনেদে আহান বা দুহান করে থইলা মুঙর থ্ংচিল হান বারো খিলকী উতা প্রায় খেত করিয়া হাজেইলা। মুঙর চাল হানর সাকা (সংস্কৃত শাখাàসাকা’,চারি-চালর ঘরর টুললিগত্ত দ্বিয় বারাদে ডেঙগির ঠৌনা সালোয়া নিকুলের আরো সাকা’ মাত্তারাতামুঙর চাল হানর উতা মুঙর ‘সাকা’, পিঠির চাল হানর উতা পিঠির সাকা)দ্বিয়গ টুললিগর লগে সামসে উপেইত্ত মাংকল হানআক কথাত মুঙর লেইখাল(চারি চালর ঘরর হুরকাঙ চাল দ্বিয় হান)উগই মাংকল হান আর-আর ঘরেত্ত ইঞ্চৌ এগ ডাঙর, পূর্ব-পশ্চিমে চারি পাড়েঙ ইম্পি বা খুটি/পালা দিলা(ইম্পি মানে ঘরর খুটি বা পালায়ুম(ঘর)+পি(পালা/খুটি) =য়ুম্পিà ইম্পি) হাদির ইম্পি দ্বিয় পাড়েঙর হাবির মুঙর দ্বিয়গি মাঙকল হানর মুঙর পটগত পরিল-উগির নাঙ ‘উহকতল দক্ষিণর উহকতলগর থাঙনার বা তৃতীয় ইম্পি উগ যাত্রাগ দিলা। মণিপুরীর লোকবিশ্বাস হান যাত্রাগ ঘরর ইম্পি হাবির  মাপুগ,  মানে ইম্পির রাজাগউহানে হাবিত্ত ইজ্জুখুত নেই বারো হবা পালা উগ বাছিয়া যাত্রা দিলা। ঘরর হাবি ইম্পির মাপুগ বা রাজাগ নিঙকরানি এহান আদিম সর্বপ্রাণবাদী ধারণাত্ত সৃষ্টি অসে লোকবিশ্বাস হান।এবাকা য়ামপারাই হিন্দু গৃহনির্মাণ শাস্ত্র বা বাস্তুশাস্ত্র মত ইলয়া ঘরর ঈশান কোণে ‘ঈশানগ বা  ‘যাত্রাগ দিতারাকিন্তু আগেদে বিষ্ণুপ্রিয়া মণিপুরীয়ে ঘরর ‘ঈশানগ দেনা’ না মাতেসি, ‘যাত্রাগ কুপানি’ বা ঘরর যাত্রাগ দেনা বুললা।
ইঞ্চৌগর চাঙ হানর বা আয়তনর গজে ঘরগর খাঙলাল/খাঙলেলর (Beam) সংখ্যা লেপইলএতা থমে(জোড়ে)পরানি গমনেই বুলিয়া তিন,পাচ বা প্রয়োজনে সাত হান-নয় হান এসাদে বেজোড় দিলা খাঙলালর গজে  সেনাইম্পি দিয়া উতার গজে হুরকাঙ খাঙলাল দিলা,– উতারে খাঙাল  বুললা  সেনাইম্পি  =হুরকাঙ খুটি (ছেনা(ছিন্ন)+ ইম্পি(খুটি)=,ছেনা ইম্পিàসেনাইম্পি) নিঙে অর মাটিত না কুপতারা মানে মাটি হানাত্ত বিচ্ছিন্ন আরো সেনাইম্পি  মাতেসিতা।ডাঙর খাঙাল উতাই  খাঙলেল/খাঙলাল(খাঙাল+রেল/লেল=খাঙাললেলàখাঙলেল/খাঙলাল, রেল/লেল মানে ডাঙর,শ্রেষ্ঠ     বা রাজতুল্যযেমন শ্রেষ্ঠ বা ডাঙর অজাগ=অজারেলশ্রেষ্ঠ বা ডাঙর মেইপাগ=মেইপারেল) ইঞ্চৌ ঘরর প্রযুক্তি হান কাদা বারার অন্যান্য জাতর ঘর(বাহা বা রুকর ঘর)হংকরানির প্রযুক্তিত্ত য়ামপারা তঙাল আর-আর জাতে হংকরতরা ঘরে ইম্পি বা খুটির গজে মারুলী দিতারাঘরর চাল হানর ভরি(ওজন)হান মারুলীগই ঙাককরের। খাঙালালর লগে চাল হানর সম্পর্ক নেইহুদ্দা ঘরর গজ হান না মেলানিবারো সিলিং হান দেনাই এতা(খাঙলাল)লাগানির মূল উদ্দেশ্যে হান কিন্তু মণিপুরী গৃহ নির্মাণ প্রযুক্তিত ইম্পি বা খুটির গজে খাঙালাল বহেইতারাউতার গজে মারুলীচাল হানর ভরি হান খাঙলালর গজে পড়েরএতা ঘরগর লেম্পাল পারা,–উহানে নিঙে অর খাঙাল এগ সাংস্কৃত স্কন্ধকাত্ত আহেসে পাউরি চাঙর ইঞ্চৌ আগর টুল্লিগর উগ সহ ডিগালি মারুলী পাঁচগ প্রয়োজনে সাতও দিলা,ঘরগর আয়তনর গজে লেপইল বারো পাথারিতা চারিগ প্রয়োজনে ছয় দিলাখাঙলাল বারো খাঙাল হামেচা ঘরগর পাথারি করে লাগেইলা(এবাকাও পাথারি দিতারা)তবে মুঙর বারো পিঠির লেইখালগির উপেইর খাঙলাল/খাঙাল ঘরগর সমান্তরালে মানে পূর্ব-পশ্চিমে (ডিগালিদে)খাঙলাল লাগেইলাআগেদে ঘরর মৌৱানির ইউনিটগ আসিলতা আত,(যেমন, নয়ে-ঊনিশে ঘরগ মানে 9*19আত)এবাকা ফুট, মিটার।কিন্তু ডাঙর ইঞ্চৌ ঘর হঙকরতে মৌৱানির ইউনিটগ আসিলতা বেঙ আত দ্বিয় হান সাল করলে বাঙ্গুরি বারার মধ্যমা আঙুলিগর আগাগত্ত বাতর বারার মধ্যমাগর আগাগ পেয়া ডিগল উহানেই বেঙ আহান। বেঙ তত্‍ভব ওয়াইগ, সংস্কৃত ব্যামর অপভ্রংশগ,বেঙ আহানে প্রায় চারি আত।
 ইঞ্চৌর ইম্ফাম(flore)এগ চারি হান কাহাত্‍ খেই-খেই-1)মাংকল(মেইতেই মাঙ্গল,2নিঙলর কাহ্ (মেইতেই নিঙলকা), 3) মাইয়াই কাহ্(মেইতেই মাইয়াইকা)বারো 4)চাকামর কাহ্ (মেইতেই  চাকাম ) কাহ্=কক্ষ বা Room(সংস্কৃত কক্ষàককষàককহাàকাহাàকাহ্ এক মাত্র মাংকল হান স্থায়ী বেড়র ঢালি দিয়া খেই করলাবাকি কাহ্ উতা স্থায়ী বের দিয়া না খেইকরলা, তবে অনেক সময় প্রয়োজনে অস্থায়ী বের দিলা
মাংকল:- মুঙেদর চাল হানর সাকা দ্বিয়গি টুল্লীগর লগে সামসে উপেইত্ত (অর্থাত্‍ মুঙর লেইখালগই মাংকলর চালহান)   মজজুত বের দিয়া মুঙর কাদাএগ মাংকলহান হঙকরলামাংকল হানর উত্তর-দক্ষিণ দ্বিয় বারাও মজ্জুত বেরর ঢালিল থেপ করলা, প্রয়োজনে অনেকেই ইঞ্চৌগর মাঙকলর মুঙবারাদেও থ্ংচিল হানর ইজজু উহান খালি থয়া দ্বিয় বারা ফাক্কাল দিলা(ফাক্কাল=মাঙকল হান কাল করতারা ফাক-ফাক বেড়)মাংকল এহান এব্বাকার ড্রয়িংরুমগর ঠৌনা ব্যবহার করলা  দক্ষিণেদর উহকতলগর লগে উত্তরেদে মুঙ দিয়া বারো মুঙর থঙচিল হানর দক্ষিণেদে মুঙেদে মুঙ দিয়া ঘরর মাপুগ বহিল। এদ্বিয় হান তারকা লেপযা আসিল ফাম হানি মাপুগ বহের ফাম উতা ফামলেল কাহ্ (রেল/লেল =শ্রেষ্ঠ বা রাজতুল্য)মানে রাজকীয় ফাম, উপেইত তা বাদে কুন আগো বহানি গমনেই ঘরে ভিতরে গিরক রাজতুল্যগ,–এহান ক্ষত্রিয় ভাবনাত্ব আহেসে লু-পা রুচিবোধর নিদর্শন আহান। উত্তরর কাদাগ বেয়াপারকা,কাদা এগদে বেয়াপাই কুলি-কাটুনির কাম করতারাবারো দক্ষিণ বারাদে মুনি বহিলা ইঞ্চৌগর মাংকল হান সহ দারীগি কাপ আহানর গজে গজে উচ করলামণিপুরীর(বিষ্ণুপ্রিয়া/মেইতেই) লোকবিশ্বাস মাংকল-দারী উচইলে লক্ষী গিথানক ঘর বেলয়া না যেইরিগা।গৃহলক্ষীরে চেত্‍ক কল করিযা থনার খৌরাঙ হান আগেদে গাত খুলিয়া ঘরে চর হমেইলামাংকল-দারী উচইলে চররতা গাত খুলিয়া ঘরে হমেইতে খানি অসুবিধানিঙে অর এহান চরর বিরুদ্ধে দুর্বল অইলেও প্রতিরোধ ব্যবস্থা আহান।মাঙকল’ শব্দএগ পূর্ববাংলার গাঙ-গরেদে ব্যবহার করতে হুনেসু।
 নিঙলর কাহ্:=ঘরর ভিতরর মুঙর অংশ উহান নিঙলরকাহ্ হান। উহানাত নিঙল বারো সৌ-সুমরা গুম্জানির ব্যবস্থা থাইল। প্রয়োজনে অস্থায়ী বেড় দিয়া খেই করলা
মাইয়াই কাহ্:=ঘরে ভিতরর হাবিত্ত ডাঙর বারো গুরত্বপূর্ণ কাহ্ হানঘরগর হমবুকগ মানে মধ্যমাংশ হান। লক্ষ্যনীয় বিষয় হান সাংস্কৃত মধ্যম বিষ্ণুপ্রিয়া মণিপুরী ‘মাইজম বাংলা ‘মেজ’, বারো পূর্ববাংলার গাঙে হমবুকর অংশ হান বুজেইতে ‘মাইজখান’ মাততারাউহানে নিঙে অর সংস্কৃত মধ্যয়িকা  শব্দত্ত  ‘মাইয়াই’ ওয়াই এগ সৃষ্টি অসে পাউরিকাহ্ এহানর হমবুকে ফুংকা(উদাল)হান থাইলাদক্ষিণ বারাদে  ঘরর মাপুগর ফামহানবারা ফুংকা হানর দক্ষিণ উবারাও ফামলেল কাহ্ মাতলাকাহ্ এহানর উত্তরেদে পিঠির থংচিল হান থইলা, উহানে চাকামর কাহ্ত্ত মাইয়াই কাহ্ হান খেইকরপিঠির থংচিল হানর কাদাত ঘরগিথানির ফাম হান বুলিয়া নিংকরলা
    
চাকামর কাহ্:=ঘরর পশ্চিমর লয়ইলগা অংশ উহান চাকামর কাহ্ হানএহানও দুহান অংশে খেই অইলদক্ষিণ উহান ঘরগর নৈঋত কোণাগ বারণর কাহ্ হানউগদে বারণগ দিলা(এবাকাও কাদা উগদে চাকামর কাহ্ হানর উত্তর-পশ্চিমে ঘরর বায়ু কোণে পিঠিয়েদে বা উত্তরেদে মুঙ দিয়া লেইরাঙ হান বহেইলা, এবাকাও বহেইতারা(বাঙালি বারো অসমীয়াই ঘরর অগ্নি কোণে মুঙেদে নাইলে দক্ষিণেদে মুঙ দিয়া  লেইরাং হান বহেইতরা) ইঞ্চৌগর চাকামর গজে খাটি(টাক)আহান থাইল উহানরে সাকেই হান বুললা আগেদে কুন-কুন সময় অনেক সময়  স্থানাভাব অইলে চাকাম হান খানি দক্ষিনেদে থেই করিয়া বায়ু কোণ এগ বেড় দিয়া নুয়া হেইমাকর খাটলগ দিলা।
মণিপুরী ঘরে বিভীন্ন লৌকিক বারো অর্ধ বৈদিক দৌলিশিং-দৌলাহার অবস্থান:-বিষ্ণুপ্রিয়া মণিপুরীর  লোকবিশ্বাস হান ঘর হাবি ঠই পালপা জীবন্ততা, গৃহরূপী দৌ বা দৌরূপী গৃহ টুল্লির মরুলীগ ঘর গর য়াঙ(মেরুদণ্ডগ)বারো চালর খচা উতা বুকর আড়সুরি নিংকরলা। আগেকার আর্য বুজন গিরি গিথানিয়ে ঘরে মানু নাথাইলে ঘরগই ডরার বুলিয়া  মাততেও হুনেসু; আগেদে হাবিও শন-বাহা বারো রুকর  ঘর দিলা–উহানে অনেক সময় ঘর-জ্বি লাগিল,– এসাদে ঘর-জ্বি লাগানির পৌ পেইলে ঘরগই ডরেইল বুলিয়া তুলসীর পানি খিককরলা। ঘরর দৌ নিক্কা নিংকরিয়া হমা দিলা; ঘরর দৌএ চাল করলে ঘরে হৈপদ নাপরিল বারো ঘরর মানু নুওয়ারা-পানি নাইলা এসাদে নিংকরলা।ঘর এগই তার আশ্রিত ঘরর মানুরে কালকরিয়া থর বুলিয়া বিশ্বাস করলা। ঘরর দৌএ চাল করলে সংসারর শ্রীবৃদ্ধি অইল, বংশ বৃদ্ধি অইল বুলিয়াও নিংকরলা—এতা আদিম সর্বপ্রাণবাদী বিশ্বাসেত্ত উজ্জেসে বিষ্ণুপ্রিয়া মণিপুরীর ধর্মবোধ বারো লোকবিশ্বাস। এসাদে সর্বপ্রাণবাদী ধারণাত্ব সৃষ্টি অসে ধর্মবোধলোকবিশ্বাস ইলয়া প্রতিহান জড় বস্তুরেও ঠই পালপা জীবন্ততা বুলিয়া মণিপুরীয়ে এবাকাও নিংকরতরা এসাদে ভাবনাত্ত সৃষ্টি অসে ধর্মবোধ ইলয়া  গরর তঙাল-তঙাল ফাম নির্দ্দিষ্ট দৌলিশিং-দৌলাহা থাইতারা বুলিয়া বিশ্বাস করতারা; অও ফাম উতা নিক্কা বিয়ান-বেলুকা লেপা-পুছা করিয়া বর্তি লাগেয়া ধুপ-থম্মেই দিলা, এবাকাও দিতারা
1)ঘরর যাত্রাগ:-ঘর এগর ইম্পি/পালা/ খুটির রাজাগ নিংকরিয়া ধুপ-থম্মেই দিতারা
2) ফুংকা(উদাল)হান:-হমবুকগত(কেন্দ্রস্থলে)থাইল  ফুংকা এহানরে ঘরর খৈতঙ্গ,বারো ফুংকার জ্বিগঘরর  ঠইগ নিঙকরলা আগেদে ঘর অঙইতে সাংকার উবাকা পরিবারর মাপু গই যেজ্বিগল হমেইল উগ নিভানি গমনেই বুলিয়া আর না নিভেইলাজবর যতন করিয়া থইলা;–জ্বি এগই জীবনর লক্ষণ হান। ফুংকা হানর পিঠির পারগত ফুংকার দৌগর(মেইতেইয়ে ফুঙ্গালাই বুলতারা)ফামহান,–এহান নিংকরিয়া লেপিয়া-পুছিয়া ধুপ-থম্মেই দিলাসেন্দাত্‍ দৌর থমমেই দিতে ফুংকার জ্বিগত আলুয়া চাউলর দানা কতগ কাত করলা,-নিঙে অর আদিম অগ্নি উপাসনার নিদর্শন আহান
3) আপোকপা গিরক:- গোষ্ঠী বা লোকেই সৃষ্টি কর্তা, আদি পিতা(আপা=পিতাঘরগর দক্ষিণ-পশ্চিমে বারণগর কাদা উগদে অপোকপা গিরকর ফামহানবিষ্ণুপ্রিয়া মণিপুরী লোকবিশ্বাস হানগিরক এগই চাল করলে বংশর ধারা-নালা বারো পরিবারর মানু হবা-বালা অয়া পুঞ্চি পালয়া থাইতারা-বংশ হানও চাঙখল অর। আদিম সৃষ্টিশীল প্রজনন ধর্মী ধারনাত্ত আহেসে বিশ্বাস হান
4)বারণর দৌগ:-ঘরর দক্ষিণ-পশ্চিমে বারণগ দিলা,উপেইত বারণর দৌগ থার,-উহানে বারণগ সেঙ করিয়া থইলা,এবাকাও থইতারা ,মণিপুরীয়ে বিশ্বাস করতারা যেদৌ এগই চাল করলে ঘরে লক্ষী বসতি অইরিখুরাকিত্‍ টান না পড়ের।সম্ভবত বারণর দৌ এগই কৈরুঙপা গিরক,অজা ডা: কালী প্রসাদ সিংহ গিরকে মাতেসেতা—কাই=শস্যাগার,লুঙ-পা=সুরক্ষা” মেইতেই ওয়াইগ বিষ্ণুপ্রিয়া মণিপুরী ঠারে পৌরেই আহান আসে—“খঙে বিলে পাহাংপা ঘরর কোণে কৈরেঙপা”তবে সেনানু দেবী গিথানকর(কলাসর)বক্তব্য হান-মুঙরথঙচিল হানর বদাগত থেঙয়া ঘরে ভিতরেদে কৈরুঙপা গিরক থার বারো মধুমতী ক্ষত্রানী(ফুলতলী)গিথানকর মতে- ফুংকা হানর কাদাত কৈরুঙপা গিরকর ফাম হান
5) ঘরর দৌ:-ঘরর নৈঋত কোণাগত্‍ দৌর ফাম হান, উহানে পিঠির বারো দক্ষিণর বেড় দ্বিয় হানাত্ত খানি থেই করিয়া বারণগ হংকরলাবিষ্ণুপ্রিয়া মণিপুরীর লোকবিশ্বাস হান, গিরক এগই ঘরর হাবিরে কাল করিয়া থর(মেইতেয়ে কোণাগত্‍ সেনামাহী গিরক থার বুলিয়া নিংকরতরা) আপোকপা গিরক, বারণর দৌ বারো রর দৌ এতা থাইতারা বুলিয়া বারণগর মুঙে নিক্কা লেপিয়া -পুছিয়া ধুপ-থমমেই দিলা,-এবাকাও অনেকগই দিতারা(রাজা বা রাজবংশজ ঘরে পাহাঙপা গিরক বারো সাধারণ মানুর ঘরে ঘরর দৌগ থার বুলিয়াও নিংকরতারা)
6)ঘরগিথানি:-ইঞ্চৌগর মাইয়াই কাহ্ হানর উত্তরেদে পিঠির থঙচিল হানর গজে ঘরগিথানির ফামহান,মেইতেইয়ে লেইমারেল মাততারা।মেইতেই বারো মাদই গাঙে গিথানক এগ য়াম নিংকর তারা গিথানকর ফাম উহানাত কুমারী নিঙল আগরেলো কাকরিয়া পিতারেই খুচেই আগত সেঙ পানি থইতারানিক্কা নিংকরিয়া ধুপ-থমমেই দিতারা নিঙে অর আদিম মাতৃ উপাসনার নিদর্শন হান
7) মাটি গিথানক(মৃত্তিকা দেবী):- অনেকর মতে মুঙর থঙচিলর বদাগত্ত থেঙয়া ইজজু মুঙ উহান মাটি গিথানকর ফাম হান বুলিয়া নিংকরতারাকুনগই বারো থঙচিল হানর ইজজু মুঙে মাংকল হানর মুঙর দাড়ির পটগ চুরিতলগর হাদি মেরাক পেয়া মাটি গিথানকর ফাম হান নিংকরতারাফাম দ্বিয় হানও এবাকাও নিক্কা লেপিয়া বর্তি লাগেইতারা,ধুপ-থম্মেই দিয়া ভক্তি কাত করতারা
8)তুলসীপুঙ্গ:- ইঞ্চৌগর মাংকল হানর চুরিতলর পানি পড়ের উহানর বাইরে উত্তরর পটগত তুলসী পুঙ্গ বৃন্দা গিথানক বুলিয়া মণিপুরীয়ে(গৌড়ীয় মেইতেই বারো বিষ্ণুপ্রিয়া)নিংকরতারা(তবে এবাকা উঠান হানর উত্তর-পূর্ব কুনে তুলসী পুঙ্গ লিংখাত করতারা) তুলসীপুঙ্গও বিষ্ণুপ্রিয়া মণিপুরীর ইঞ্চৌগর অবিচ্ছিন্ন অংশ আহান পারাসে নিক্কা তুলসী সেবার লগে ইঞ্চৌ ঘরর যে লৌকিক বারো অর্ধ বৈদিক দৌলিশিং-দৌলাহা হাবিরে ঘরে-ঘরে নিংকরলা, এবাকাও নিংকরতারা।আগেদে গান্ধঙর নাসা হাঞ্জেইলে ঘরে ঘরে বার্তন দিলাবার্তন বুলিয়া নাও মাতলা-তুলসী পুঙ্গর কাদাত্‍ মাংকলর ফাক্কাল হানাত থৌ না লাগাসি বর্তি আগো খুইয়া থদিলা উহানেই গান্ধঙ নাসানির বার্তন হান(কলাসরে মি নিজে নাঙসু)।
    তুলসী পুঙ্গমাটি গিথানক সহ ঘরর হাবি লৌকিক দৌলিশিং-দৌলাহা সেবা করানি এহান প্রাক বৈষ্ণবীয় মণিপুরী(মেইতেই/বিষ্ণুপ্রিয়া)সংস্কৃতির নিদর্শন হান।এতা মেইতেইর সেনামাহির তুল প্রায় মান্না আদিম প্রজননধর্মী সৃষ্টিশীল ভাবনার লগে সর্বপ্রাণ বাদী বিশ্বাস বারো অর্ধবৈদিক চেতনার সমন্বযে সৃষ্টি অসে থাইনাকার মণিপুরী লোক বিশ্বাস বারো ধর্মবোধর আয়ৌইপা লিম। ইঞ্চৌগর অংতাঅবস্থান বারো প্রযুক্তি ঘরর মানুর সুনির্দিষ্ট  কাহ্ ব্যবহারর সিজিল বারো ঘরে ভিতরর দৌলিশিং-দৌলাহার লেপপা ফাম হাবি লুপা আদিম মণিপুরী রুহী-বৃত্তির নিদর্শনএতাই বিষ্ণুপ্রিয়া মণিপুরীর রুচি বোধ পরিচয় বহন করের। হাবিত্ত জিঙে নাপাল করানির বিষয় হান আদিম লৌকিক দৌলিশিং-দৌলাহার উপাসনার লগে গৌড়ীয় বৈষ্ণব ধর্মর কুন তান্না-তান্নি বা বিরোধ সৃষ্টি নাসে মণিপুরী লোকধর্ম বারো গৌড়ীয় বৈষ্ণব ধর্ম কন্না-কন্নি করিয়া দ্বিয় হানও পালসে এহানই লুপা মণিপুরী(মেইতেই/বিষ্ণুপ্রিয়া)সংস্কৃতি হান। কিন্তু গেলগা শতাব্দী লয়নির মাতামেত্ত মেইতেইরমা আদিম লোকধর্মর অনুসারী সেনামাহী দাপা গৌড়ীয় বৈষ্ণব ধর্মর চুড়ান্ত বিরোধীতা করতারাবারো বিষ্ণুপ্রিয়া মণিপুরীর মাও অতি গৌড়ীয়পন্থী অনেকগই আদিম সর্বপ্রাণবাদী বিশ্বাসর গজে ভিত্তি করিয়া অর্ধবৈদিক ধর্মবোধর মাতুঙ ইলয়া হঙসে আদিম লোকধর্ম মণিপুরর থাইকার লোকবিশ্বাস,ধর্মবোধ উহানরে মেইতেইর হান নিংকরতারাআকতা মেইতেইরকা বিপজ্জনকআরাক আকতা বিষ্ণুপ্রিয়া মণিপুরীর লোক-ধর্মলোক-সংস্কৃতিরকা  ক্ষতি কারকবারো ইতিহাস সংরক্ষণর ক্ষেত্রে বিপজ্জনক।  
    তথ্য সুত্র:-
1)’Valley Society of Manipur’—By R.K. Saha
2)রুহীবৃত্তির সাক্ষী ইঞ্চৌগর’ By প্রতাপ সিংহ(11/07/2011 ‘কন্নাপি’ মাসিক সাহিত্য পৌ চেত
  ফঙসিল)
3)‘An Etymological Dictionary of Bishnupriya Manipuri’—By Dr. K.P.Sinha
4)‘বঙ্গীয় শব্দকোষ’ (প্রথম খন্ড)—By হরিচরণ বন্ধোপাধ্যায়।
5)অজা গৌরমোহন সিংহগোপী মোহন সিংহ(কীর্ত্তনতলীকৈলাসহর)প্রদীপ সিংহসেনানু দেবী    
   বারো মধুমতী ক্ষত্রানী ।May be an image of tree and outdoors

Leave a Reply

Your email address will not be published. Required fields are marked *