আপাঙর য়ারি – ৪

আপাঙর য়ারি – ৪

আকদিনতে আপঙর মালক এগৈ আপাঙরে মাতিরিতা, আপাঙ যাগানে দারৌ গাছি আনগা ভাতে হমেইঙগা করে ‌।

মালকর কথাহান হুনিয়া আপাঙ এগ দা-বানুক লগে করিয়া দারৌ আনাত বুলিয়া গেলগা ।

পথগর কাদাত ডাঙর গাছ আকজারে হুকানা ডাল আগ আছে ঔগ দেহিয়া লেপকরল ইমে এগই নিয়া যিতৌগা বুলিয়া ।

আপাঙ এগ গাছ ঔজারিত কাইলগা, কায়া গজ্জে গিয়া হুকানা ডাল ঔগত বহিলগা । ডালগত বয়া ডালগর গুরিগদে দাহানলো সেদানি অকরল !

ঠিক তাঞ্জা ঔহানাত গিরক আগ পথগদে দিয়া যারগা ঔগৈ আপাঙর কাণ্ড এহান দেহিয়া লাঙৈল !

আচানক অয়া আপাঙ এগরে ডাহিয়া মাতের – হা আপাঙ, তিতে কি কাণ্ডহান কররতা ! ডালগত বয়া ডালগর গুরিগদে কাপরতাতে পরিয়া মরতে করে !

আপাঙ এগৈ হুনিয়া সুপকরেউ না গনিয়া ডালগ সেদা সেদা মাতের – না বকি যাগা গিরকগ, মি পরতৌ-নাপরতৌ ঔহান তি আগেত্ত কিসাদে হারপেইলেতা ! তি গনাআলাগ থাঙ ! গনা চেয়া ভবিষ্যতর কথা মারতা ! চালাক্করে এপেইত্ত যাগা হেকোছে ।

গিরক এগৈ আপাঙর কথাহানি হুনিয়া আচরিত অয়া আপাঙর ঔগদে কতহান চেয়া থাইল, খানি পিসেদে বেলেয়া গেলগা যেতা অয়াউ থাক বুলিয়া ।

গিরক ঔগ ঔপেইত্ত যিতেগা নাযিতেগাই আপাঙ এগৈ সেদার ডাল ঔগ বাগিয়া গজেত্ত জুরুম করে পরিল !
গাছজারিত্ত তলে পরিয়া আপাঙ এগৈ ঙাকয়া খালকরের, অবায় হুত্তুমেউ পরলুতাতে ! গিরক এগৈ কিসাদে হারপেয়া মাতলতা ডালগ বাগিয়া গাছজারিত্ত মি তলে পরতৌ এহান ! তার মানে গিরক এগতে গনা আলাগ সৈনেই, গনা চেয়া ভবিষ্যত মাতে পারেরগ !

আপাঙ এগ দাপ আহানল গিয়া গিরক ঔগর পথগ থেপকরিয়া উবা অইলগা । মাতের, হে গিরক তি মাতলে কথাহান হুত্তুমেউ ফলিল ! ডালগ বাগিয়া মি গাছজারিত্ত তলে পরলু ! তি কিসাদে আগেত্ত হারপেইলেতা মি পরতৌহান ! তার মানে তি গনা চানা পারর মানুগ । নাগৈতা ?

গিরক এগ আচানক অয়া আপাঙ এগরে চার ! কতো আহান বুঝেয়া মাতানির চেষ্টা করল যে ডালগত বয়া ডালগর গুরিগদে সেদেইলেতে যেগৌ বালা ডালগ বাগিয়াহে তলে পরতাইহান নাই । কিন্তু আপাঙ এগৈ আর কুনো যুক্তিই হুনানি নাকরের, ইমে গিরক এগরে সৈনায়া গনা আলাগ সাব্যস্ত করিয়া কতোতা আঙকরে মাতে নেরগা । এসাদে অইতে অইতে খাঙতা করে আপাঙ এগৈ মাতের, ঔহান অইলেতে তি মোরে গনা চেয়া মাতে পারতেই মি কুম্বাকা মরতৌহান । তি এবাক্কাই মোরে বাগা মি কুনদিন মরতৌতা । হেকোছে মাত ।

গিরক এগ ফাপর আগত পরিল । আপাঙ এগরে তা কিসাদে কিতালো বুঝেয়া মাততো গনা টনা কিত্তাউ নাজানেগো । আপাঙ এগতে কুনোতাউ হুনেকুরা বুঝেকুরাগ নাগৈ হানতে । অনেকতা খালকরতে খালকরতে পিসেদে ইমে আহান অইলেউ খুমকরিয়া কুনোমতে লিতয়া জিঙগা নিঙকরিয়া মাতের – আপাঙ তোরতা লারিগদে রাঙা লুরি আগাছ নিকুলতৈ ঔদিন তি মরতেইগ । ঔতা বুলিয়া গিরক ঔগ কুনোমতে লিতয়া ঔপেইত্ত বেলেয়া গেলগা ।

আপাঙ এগৈ গিরক ঔগর কথাহান হুনিয়া জুম মারিয়া থাইল । পিসেদে অনেকতা খালকরে খালকরে ঘরেদে গেলগা ।

পিসেদেতে হাতে হাতে দিন এতা দিয়া যারগা কিন্তু আপাঙ এগরতা রাঙা লুরি আকগাসৌ না নিকুলের এরে চিন্তাত তারতা অশান্তির অন্ত নেয়োযারগা । অইতে অইতে আর খাঙকরে নারিয়া আপাঙ এগৈ আকদিন মালকে লুরি নাটুয়েইরি ঔপেইত কাদাত বয়া রাঙা লুরি আগাছ লারিগদে ডুয়েইয়া বরেয়া মালকরে মাতের, ইমা মোরতা লারিগদে রাঙা লুরিগাছ নিকুলিল, গনা আলা আগৈ মোরে মাতেছিলগ এসাদে অইতই ঔদিন মি মরতৌ বুলিয়া । তারো, মরে পুরেদিয়া নাইলে মাটিত গাতা দিয়া মোর অন্তিম সংস্কার করেদেইগা ।

আপাঙর এসাদে আজব কথা এতা হুনিয়া আপাঙর মালক অবাক অইলি ! মাতিরি – আপাঙ, কিতা আবি জাবি গুজুররতা ! তোরে জিঙতা জিঙতা অন্তিম সংস্কার কিসাদে করতাঙাইতা, পাগল অইলেতা না কিতা !

আপাঙ এগৈ কুনো কথা সুপেউ নাহুনের, মরিঙ পরিঙ চিকারি দিয়া মাতের মি মরলুগ মোরে সংস্কার করেদেইগা…
লৌদে লৌদে কাদিয়া এসাদে উৎপাত করে নেরগা এহানে আকয়া আপাঙর মালক এগৈ আর খাঙকরে নারিয়া কাদাবারার মানু হাবিরে ডাহিয়া মাতল – এগরে নিয়া যেইগা, তা যেহান মনার ঔহান গিয়া করেদেইগা ।

হাবিহানে আপাঙ এগরে তুলিয়া নিলাগা, ঘাটর পারে নিয়া আপাঙে যেসাদে মাতের ঔসাদে করেইলা – মাটি খুলিয়া ঘারগ পেয়া মাটিত গাতাইলা । গারিগ হাবি মাটিত গারিয়া হুদা মুরগ নিকুলিয়া থাইল । আপাঙ এগ হারৌ অইল ।

হাবিহান বেলেয়া গেলাগা, আপাঙ এগ আকখুলাগৈ ঘাটর পারে এসাদেই পরিয়া থাইল । চেইতে চেইতা দিনহান গেলগা, বেলিহমেইল, সেন্ধাহানৌ লালয়া রাতিকার গুর আধারহান গারোয়া আহিল । আপাঙ এগ ইমে এসাদেই ঔপেইত জুম মারিয়া পরিয়া থাইল ।

রাতি নঙেই অইলগা অউপেইত চরর দল আহান যিতারাগাতা জমিদারর ঘরগত চরকরানিরকা । খাঙতা করে চর ঔতা আগৈ মাতের, বাসেই হে মোরতা মাঙনি আগ আহের !
বাকি চর ঔতাই মাত্তারা আমি এপেইত বাসেয়া থাইতাঙাই তি মাঙয়া আয়গা । আরাক চর আগৈ মাতের, ঔরে ঘাটর পারে চা কালাগ করে দেহিয়ারতা রুকর গুরিগ পাউরি, ঔগত বয়া মাঙয়া আকসাটে সেঙয়া করিয়া আয়গা ।

হায় হায় বুলিয়া চর ঔগ মাঙনিগৈ আকয়া ইরাইরি অয়া গিয়া রুকর মুরাগর সাদে কালাগ করে দেহের আপাঙর মুর ঔগত বয়া মাঙনিরকা করতেই আপাঙ এগৈ হুঙ্কার দিয়া মাতের – কুঙ্গ !
চর ঔগ উঙখাৎ অয়া চিকারিগল আকফালে আপাঙর মুরগত্ত লামিল ! লৌগ হুনিয়া বাকি চর ঔতাউ হাবিহান ইরাইরি কাদাহানাত আয়া চেইতারাগা ঔপেইত আপাঙ এগরে দেহিয়া লাঙৈলা ! হা, আপাঙ তিতে কিতায়া এসাদে এপেইত আহততা বুলিয়া আচরিত অয়া আঙকরতারা ।
আপাঙে মাতের, মোরতা যেসাদে যেতা অয়াউ থাক, তুমি মাতো এমাটিক রাতি এহানাত কুরাঙ যারাইগাতা ?
চর ঔতাই মাত্তারা, আমিতে জমিদারর ঘরগত চরকরানিকা যিয়ারগাতা ।
আপাঙে মাতের, ঔহান অইলেতে মোরেউ নেইগা বেনাই তুমার লগে ।
আপাঙর কথাহান হুনিয়া চর ঔতাই হারৌ অয়া খালকরলা এগরে লগে নিয়া চরে বরাদিয়া তানু বাহিরে থাইতাই, ধরা খেইলে এগো ফাসতৈ তানু লিতয়া দাবদিতাই, ধরা নাহেইলেতে অরতে জমিদারর ঘরেত্ত এগরেলো হাবিতা লুটিয়া নিয়া যিতাইগা বুলিয়া আগরে আগৈ ইশারালো জানাজানি দিয়া আপাঙ এগরে মাটি সেচেয়া ভিতরেত্ত নিকাললা, পিসেদে ইরাইরি জমিদারর ঘরগদে সালৈলা চরকরাত ।

জমিদারগর ঘরে ফৌওয়া পিঠিয়েদে দারিগত্ত অকরে ডাঙর গাত আগ খুলিয়া ভিতরে হমানির ব্যবস্থা করলা । আপাঙ এগরে ভিতরে গিয়া জিনিস নিকালেয়া আনানিরকা মাতলা । শেঙশেঙর কল-খেরি কিতা অউতা বাসে বাসে আনানিরকা আপাঙ এগরে মাত্তারা । আপাঙে ঔতা চিনে নারতৈ পাউরি বুলিয়া বুঝেয়া মাতলা – আপাঙ, বাজেইলে বাজের ঔতা বাসে বাসে আনিছ হারপেইলে ।
আপাঙে হায় হায় বুলিয়া ঘরে ভিতরে হমেইলগা । ভিতরে হমেয়া বাজেইলে বাজবো জিনিস বিসারানিত থেঙইল । এসাদে বিসারতেই মুঙহানাত দেহেরতা ডাক আগ উবা করিয়া থদেছিহান । আপাঙ এগৈ খালকরল, বাজেইল বাজতৈ জিনিসহানতে এগো অথাইব । ঔহান নিঙকরিয়া আপাঙে ডাক ঔগ পরকো আহুলদিয়া – এগো আনতু বুলিয়া হুইয়া বাজানি অকরলো !

আপাঙর কাণ্ড এহানাত বাহিরে আছিলা চর ঔতা নেই আক দাপে কুঙ্গদে মাঙৈলাগা !
আপাঙর ডাকর বারি হুনিয়া জমিদারর ঘরর মানু হাবিহান তুপিঙ নাপিঙ অয়া ঘুমেত্ত উঠলা ! আপাঙ এগরে পেয়া চরগ ধরলাঙ বুলিয়া হাবিহানে মারিক দুহিক বুলিয়া অইলা অউপেইত জমিদার গিরক ঔগৈ আয়া হাবিরে খামকরিয়া মাতের, বাসেই বাসেই, আপাঙরে কুনোহান করবাই সিঙোয়ো । আজি আপাঙে ডাকগ বারেইতেগা হে জমিদারর ঘর এগর দামি দামি জিনিস এতা হাবিতা রক্ষা অইলতা । নাইলেতে চরে হাবিতা হুরিয়া নিয়া গেলাগাইছ ।
অউতা বুলিয়া জমিদার গিরকে আপাঙ এগরে আরো জিঙে ধন-দোলত মাহি পুরস্কার দিয়া আপাঙরে তার ঘরে ফৌকরে দিলোগা ।
আপাঙর মালকে আপাঙর কীর্তির য়ারি হাবি হুনিয়া বারো পুরস্কার মাহি এতা দেহিয়া হারৌ হারৌ অইলি । আপাঙর কীর্তির সালেদে জমিদারর পুরস্কার পেয়া অউদিনেত্ত তানু নুঙেই অয়া থাইলা ।

5 Replies to “আপাঙর য়ারি – ৪

MichaelLef Reply
edit

flomax rx

zelma Reply
edit

Waiting patiently for you to come home and fuck me! https://cutt.ly/R9omJXa

zelma Reply
edit

Waiting patiently for you to come home and fuck me! https://is.gd/dBsd60

zelma Reply
edit

Waiting patiently for you to come home and fuck me! https://bit.ly/3UKFVxa

Ashu Kanti Sinha Reply
edit

আপাঙর য়ারি –
বিষ্ণুপ্রিয়া মণিপুরী লোককাহিনী সিরিজ আহান –
১,২,৩,৪ হান পেয়া এপেইত পোষ্ট অয়া আছে, পাকরেদিবাঙ…

Leave a Reply

Your email address will not be published. Required fields are marked *